కేంద్రం మాజీ మంత్రి భార్యను ప్రశ్నించిన సీబిఐ

Posted: 09/21/2014 06:36 PM IST

శారదా ఛిట్ ఫండ్ కుంభకోణం ప్రకంపనలు తమిళనాడును కూడా తాకాయి. ఈ కుంభకోణం కేసులో కేంద్ర మాజీ ఆర్థిక మంత్రి పి. చిదంబరం సతీమణి నళిని చిదంబరం చుట్టూ ఉచ్చు బిగుసుకుంటోంది. చిదంబరం సతీమణి నళినిని సీబీఐ అధికారులు ప్రశ్నించారు. చెన్నైలో ఆమెను సీబీఐ అధికారులు ప్రశ్నించారని అధికార వర్గాలు వెల్లడించాయి. ప్రస్తుతం జైలులో ఉన్న శారదా చిట్ఫండ్ చైర్మన్ సుదీప్త సేన్.. లాయర్ ఫీజు కింద నళినికి కోటి రూపాయలు చెల్లించినట్టు వెల్లడించారు. దీనిపై ఆమెను సీబీఐ అధికారులు ప్రశ్నించినట్టు సమాచారం. నళినిని సీబీఐ అధికారులు ప్రశ్నించినట్టు వచ్చిన వార్తలను ఆమె సన్నిహితులు కొట్టిపారేశారు. శారదా చిట్ఫండ్ నుంచి న్యాయబద్దంగానే నళిని కోటి రూపాయలు తీసుకున్నారని చెప్పారు.

కాగా,  అస్సోం మాజీ డీజీపీ శంకర్ బారువా ఆత్మహత్య తరువాత సీబీఐ ఈ కేసు విచారణను మరింత వేగిరం చేసింది. నిందితులు ఎవ్వరూ తప్పించుకోకుండా చర్యలు చేపడుతోంది. పశ్చిమబెంగాల్ లో తీవ్ర స్థాయిలో జరిగిన ఈ కుంభకోణం పలు ఈశాన్య రాష్ట్రాలలో కూడా జరిగిందని అప్పట్లోనే కధనాలు వెలువడ్డాయి. ఈ కేసులో పశ్చిమ బెంగాల్ ముఖ్యమంత్రి మమతా బెనర్జీని కూడా విచారించాలని బీజేపి జాతీయ అధ్యక్షుడు అమిత్ షా డిమాండ్ చేశారు.

జి మనోహర్