అనువైన ప్రాంతంలోనే రాజధాని నిర్మాణం..

Posted: 09/20/2014 07:27 PM IST

ఆంధ్రప్రదేశ్ రాజధాని విజయవాడే అని ముఖ్యమంత్రి చంద్రబాబు ప్రకటన చేసిన తరువాత తమ ప్రాంతంలో ఎక్కడ రాజధాని వస్తుందా అంటూ విజయవాడ వాసులు ఉత్కంఠకు గురవుతున్నారు. రాజధాని నిర్మాణం కోసం భూముల సేకరణలో భాగంగా కమిటీని చంద్రబాబు ఏర్పాటు చేయడంతో.. వారు ఏ ప్రాంతంలో పరిశీలన జరుపుతున్నారో తెలుసుకోవాలన్న ఆసక్తి బెజవాడ వాసుల్లో నెలకోంది. తమ చెంతలోనే రాజాధాని వస్తున్నా.. అది ఏ ప్రాంతమని ఎదురుచూస్తున్నారు. ఈ నేపథ్యంలో మీడియా కూడా ఆసక్తిని కనబర్చింది. టీడీపీ ఎంపీ సుజనా చౌదరిని రాజధాని విషయమై ప్రశ్నించింది.

రాజధానికి ఏది అనువైన ప్రాంతం అని భావిస్తే అక్కడే ఏర్పడుతుందని ఆయన నింపాదిగా సమాధానం ఇవ్వడంతో మీడియా అసహనం వ్యక్తం చేసింది. ఎంతో ఉత్కంఠగా సమాధానం కోసం ఎదురుచూస్తే.. ఇలా సమాధానం ఇస్తారా అనుకుందో ఏమిటో.. సూటిగా ఎంపీ ఆస్తుల వివరాలను కోరింది. తనకు బందరులోనూ, కంచికచర్లలోనూ భూములు ఉన్నాయని ఆయన నవ్వుతూ చెప్పారు. తన భూములు ఉన్న చోట రాజధాని ఏర్పాటు అయితే అవవచ్చునని అన్నారు. శాస్త్రీయంగా రాజధానికి ఏది అనువైన ప్రదేశం అని తేలుతుందో అక్కడే రాజధాని నిర్మాణం జరుగుతుందని చెప్పారు. రుణమాఫీకి ప్రభుత్వం కట్టుబడి ఉందని తెలిపారు.