రెండు వందలు అడిగితే.. రూ. 26 లక్షలు ఇచ్చింది

Posted: 09/20/2014 12:29 PM IST

Student shocks as atm gives 26 lakhs instead of 200

రెండు వందల రూపాయలు అడిగితే.. ఏకంగా 26 లక్షల రూపాయలు ఇచ్చేసింది. ఇదేంటి విచిత్రంగా వుందనుకుంటున్నారా..? అవునండి.. నిజమే.. కేవలం రెండు వందల రూపాయలను డ్రా చేద్దామనుకుని కోసం వెళ్లిన ఓ విద్యార్థికి ఏకంగా 26 లక్షల రూపాయలు ఇచ్చింది. ఇంతకీ ఎవరావిడా అనుకుంటున్నారా..? ఎస్ ఆర్ నగర్ లోని ఎస్ బీ హెచ్ ఏటీయం. రెండు వందల రూపాయలు డ్రా చేసేందుకు ఏటీఎంకు తన స్నేహితుడితో వెళ్లిన లతీఫ్ ఆశ్చర్యానికి లోనయ్యాడు. లతీఫ్ డబ్బు తీసుకుంటూ ఉండగా.. మిషన్ కింద నుండే తలుపు తెరుచుకుని ఆటోమెటిక్గా తెరుచుకుని.. అందులోంచి డబ్బు కిందపడింది.

షాక్ లో వున్న లతీఫ్ జరిగిన విషయాన్ని టోల్ ఫ్రీ నెంబర్ ద్వారా బ్యాంకు అధికారులకు సమాచారం అందించాడు. అయితే బ్యాంక్ అధికారులు తమ పరిధిలోకి రాదని చెప్పటంతో.... లతీఫ్ ఈ విషయాన్ని ఎస్ఆర్ నగర్ పోలీసులకు తెలిపాడు. హుటాహుటిన అక్కడకు చేరుకున్న పోలీసులు ఏటీఎంను పరిశీలించారు. అంతకు ముందే ఏటీఎం మిషన్లో డబ్బు పెట్టిన అధికారులు లాక్ వేయకుండా వెళ్లిపోయారని గమనించారు. సిబ్బంది నిర్లక్ష్యంగా వ్యవహరించటం వల్లే ఈ ఘటన జరిగినట్లు పోలీసులు నిర్థారించారు. బ్యాంక్ సిబ్బందిని పిలిచి విచారణ జరిపారు. ఏటీఎం వద్ద సెక్యూరిటీ గార్డుతో పాటు సీసీ కెమెరాలు కూడా లేనట్లు పోలీసులు గుర్తించారు. బ్యాంకు అధికారుల నిర్లక్ష్యంపై పోలీసులు ఆగ్రహం వ్యక్తం చేశారు.

జి మనోహర్