మధ్యదరలో వంద మంది చిన్నారుల జలసమాధి

Posted: 09/17/2014 08:28 AM IST

100 children drowned by traffickers near malta

మధ్యదరా సముద్రంలో మాల్టీస్ వద్ద జరిగిన నౌక మునక ఘటనలో వంద మంది చిన్నారులు జల సమాధి అయ్యారు. సుమారు 500 మంది జలసమాధి కాగా, వారిలో చిన్నారులే వంద మందికి పైగా వున్నారు. నౌక మునిగిన ఘటన నుంచి ప్రాణాలతో బయటపడిన ఒడ్డుకు చేరుకున్న వారు ఈ వివరాలను చెప్పారు. గత వారం జరిగిన ఈ ఘటనకు సంబంధించి వారు మరిన్ని వివరాలు వెల్లడించారు. ఈజిప్టు నుంచి ఇటలీకి ప్రయాణిస్తుండగా మధ్య సముద్రంలోకి తమ నౌకను స్మగర్లు అడ్డుకున్నారని తెలిపారు. తమ పడవలోకి రమ్మని నౌకలోని ప్రయాణికులకు హెచ్చరికలు చేశారని, అయితే భయాందోళన చెందిన ప్రయాణికులు.. ఎవ్వరూ వారి పడవలోకి వెళ్లలేదని చెప్పారు.

దీంతో కోపోద్రిక్తులైన స్మగర్లు తమ నౌకను ఢీకొట్టి.. నీళ్లలో మునిగిపోయేలా చేశారన్నారు. ఈ ఘటనతో హతాశులైన వందలాదిమంది ప్రయాణికులు జలసమాధి అవుతుంటే.. స్మగ్లర్లు వికటాట్టహాసపు నవ్వులు నవ్వారని ఆవేదన వ్యక్తం చేశారు. మనుష్యుల అక్రమరవాణాకు పాల్పడే స్మగ్లర్లే ఈ ఘాతుకానికి పాల్పడి వుంటారని అధికారులు అనుమానిస్తున్నారు. ఈ ఘటనలో ఇద్దరు పాలస్తీనియన్లను, మరో తొమ్మిది మంది గ్రీకు, మాల్దీవులకు చెందిన వారిని కాపాడామని.. మిగతా వారందరూ మరణించి వుంటారని ఇంటర్నేషనల్ ఆర్గనేజేషన్ ఫర్ మైగ్రేషన్ (ఐఓఎం) తెలిపింది.

జి.మనోహర్