‘మెదక్’లో కారు జోరు.. భారీ మోజారిటీతో గెలిచిన టీఆర్ఎస్

Posted: 09/16/2014 01:57 PM IST

మెదక్ లోక్సభ స్థానానికి జరిగిన ఉప ఎన్నికలలో అధికార టీఆర్ఎస్ ఘనవిజయం సాధించింది. టీఆర్ఎస్ అభ్యర్థి ప్రభాకర్ రెడ్డి 2లక్షల 67 వేల 900 ఓట్ల మెజార్టీతో గెలుపొందారు.  కాంగ్రెస్ పార్టీ రెండో స్థానంలో నిలవగా, బీజేపీ మూడో స్థానంతో సరిపెట్టుకుంది. మెదక్ జిల్లా రుద్రారంలోని గీతం విశ్వవిద్యాలయంలో జరిగిన ఓట్ల లెక్కింపు కార్యక్రమంలో టీఆర్ఎస్ తొలి రౌండ్ నుంచి ఆదిక్యం కనబరుస్తూ వచ్చింది. సంగారెడ్డి, గజ్వల్ లలో బీజేపి, నర్సాపూర్, పటాన్ చెరువు నియోజకవర్గాలలో కాంగ్రెస్ రెండవస్థానంలో నిలువగా, అన్ని నియోజకవర్గాల్లో కారు మొదటిస్థానంలోనే నిలిచింది. అధికార పక్షాన్ని ఓడించేందుకు కాంగ్రెస్, బీజేపీ చేసిన ప్రయత్నాలను మెదక్ ప్రజలు తిప్పికొట్టారు. టీఆర్ఎస్కే మళ్లీ పట్టం కట్టారు. తెలంగాణ ముఖ్యమంత్రి కేసీఆర్ రాజీనామాతో వచ్చిన ఎన్నికలలో మరోమారు టీఆర్ఎస్ నే గెలిపించారు. కాంగ్రెస్ నుంచి సునీతా లక్ష్మారెడ్డి, బీజేపీ నుంచి జగ్గారెడ్డి వరుసగా రెండు, మూడో స్థానాలకు పరిమితమయ్యారు.

బంగారు తెలంగాణకు కృషి: కొత్త ప్రభాకర్ రెడ్డి
మెదక్ ఉప ఎన్నికల్లో టీఆర్ఎస్ విజయం ఊహించిందేనని ఆ పార్టీ లోక్ సభ అభ్యర్తి కొత్త ప్రభాకర్ రెడ్డి అన్నారు. ఫలితాల అనంతరం మీడియాతో మాట్లాడుతూ ఓటింగ్ శాతం తగ్గినా.. ఓటు వేసిన ప్రజలు మాత్రం టీఆర్ఎస్ పక్షాన నిలిచారన్నారు. మంచి మెజార్టీతో గెలిపించినందుకు తాను ప్రజలకు రుణపడి వుంటానన్నారు. గెలుపుకు కృషి చేసిన నియోజకవర్గ ప్రజలకు ధన్యవాదాలు తెలిపారు. ప్రజలు టీఆర్ఎస్ను విశ్వసించారని, కేసీఆర్ నాయకత్వంలో రాష్ట్రం అభివృద్ది చెందుతుందని నమ్మారని కొత్త ప్రభాకర్ రెడ్డి పేర్కొన్నారు. బంగారు తెలంగాణ కోసం కృషి చేస్తానన్నారు. నియోజకవర్గ అభివృద్ధికి టీఆర్ఎస్ కట్టుబడి ఉందని చెప్పారు

జి.మనోహర్