అన్ని చోట్లా అధికార పార్టీలదే హవా..

Posted: 09/16/2014 11:08 AM IST

దేశవ్యాప్తంగా పది రాష్ట్రాల్లోని 3 లోక్ సభ, 33 అసెంబ్లీ స్థానాలకు జరిగిన ఉప ఎన్నికల కౌంటింగ్ కొనసాగుతోంది. గుజరాత్లో తొమ్మిది అసెంబ్లీ, ఓ లోక్సభ స్థానానికి ఉప ఎన్నికలు జరగగా, వడోదర లోక్ సభ స్థానాన్ని అధికార బీజేపి కైవసం చేసుకుంది. ఈ స్థానం నుంచి బరిలో నిలిచిన బీజేపి అభ్యర్థి రంజన్ భట్ లక్షా 83 వేల ఓట్ల మెజారిటీతో గెలుపోందారు. ఆరు అసెంబ్లీ స్థానాల్లో ఆరింట బీజేపి ముందంజలో వుండగా, మరో మూడు స్థానాల్లో కాంగ్రెస్ ముందంజలో కొనసాగుతోంది. ఇక  గుజరాత్, రాజస్థాన్‌లలో ట్రెండ్స్‌ బీజేపీకి అసంతృప్తి కలిగించే విధంగా ఉన్నాయి. రాజస్థాన్లో నాలుగు అసెంబ్లీ స్థానాల్లో  మూడుచోట్ల బీజేపీ, ఓ స్థానంలో కాంగ్రెస్ ముందంజలో ఉన్నాయి. ఉత్తరప్రదేశ్లో 11 అసెంబ్లీ స్థానాల్లో ఆరుచోట్ల బీజేపీ, నాలుగు స్థానాల్లో సమాజ్వాదీ ఆధిక్యంలో ఉండగా, పశ్చిమ బెంగాల్లో రెండు స్థానాలకు గానూ తృణమూల్ కాంగ్రెస్, కాంగ్రెస్ ముందంజలో ఉన్నాయి.

తెలంగాణలో ‘కారు’, ఆంధ్రప్రదేశ్ లో ‘సైకిల్’ జోరు

ఇటు తెలంగాణలోని మెదక్ లోక్‌సభ స్థానానికి జరిగిన ఎన్నికలలో కారు జోరు కొనసాగుతుండగా, ఆంధ్రప్రదేశ్‌లోని కృష్ణా జిల్లా నందిగామ శాసనసభ స్థానానికి జరిగిన ఉప ఎన్నికలలో సైకిల్ ముందంజలో దూసుకువెళ్తుంది. మెదక్‌లో మొదటి రౌండ్ లెక్కింపు పూరైయ్యే సరికి టీఆర్ఎస్ పార్టీ అభ్యర్థి కొత్త ప్రభాకర్ రెడ్డి 18 వేల 443 ఓట్ల అధిక్యంలో వున్నారు. టీఆర్ఎస్ కు 32, 394 ఓట్లు కాంగ్రెస్‌కు 13,951, బీజేపికి 7,014 ఓట్లు వచ్చాయి. ఓట్ల లెక్కింపు తీరును జిల్లా కలెక్టర్ రాహుల్ బొజ్జతోపాటు ఎన్నికల సంఘం పరిశీలకుడు పంకజ్ అగర్వాల్ పరిశీలిస్తున్నారు. నందిగామ: కృష్ణా జిల్లా నందిగామ ఉప ఎన్నిక కౌంటింగ్ కొనసాగుతోంది. టీడీపీ అభ్యర్థి ఆధిక్యంలో దూసుకుపోతున్నారు. పది రౌండ్లు పూర్తయ్యేసరికి తెదేపా అభ్యర్థి తంగిరాల సౌమ్య 54,607 ఓట్ల ఆధిక్యంలో ఉన్నారు. రెండో స్థానంలో కాంగ్రెస్ అభ్యర్థి కొనసాగుతున్నారు.

జి.మనోహర్