పహాడి షరీఫ్ అర్ధరాత్రి నుంచి తనిఖీలు

Posted: 09/03/2014 08:59 AM IST

Police search operation in pahadi sharif

హైదరాబాద్ శివారులోని పహాడి షరీఫ్ లో పోలిసులు అర్ధరాత్రి నుంచి తనిఖీలు చేపట్టారు. సుమారు 400మంది పోలిసులు 32 బృందాలుగా ఏర్పడి అణువణువూ గాలించారు. అంతేకాకుండా తనిఖీల కోసం ప్రత్యేకంగా శిక్షణ పొందిన 14 బృందాలు ప్రత్యేకంగా ఈ ప్రాంతాన్ని గాలింపు చేపట్టాయి. షాహిస్ నగర్ లో ప్రతి ఇంటినీ జల్లెడపట్టారు. ఇంట్లోకి అర్ధరాత్రి వచ్చి సోదాలు చేయటంపై పలువురు అభ్యంతరం వ్యక్తం చేశారు. అయితే నేరాల నియంత్రణ కోసం, పలు కేసుల్లో నిందితుల అరెస్టు కోసమని పోలిసులు చెప్తున్నారు.

పాములతో బెదిరించి మహిళలపై అత్యాచారాలకు పాల్పడే స్నేక్ గ్యాంగ్ ను ఇప్పటికే అరెస్టు చేశారు. ఇంకా ఈ తరహా గ్యాంగులు ఉన్నాయా? అనే అనుమానంతో పోలిసులు అర్ధరాత్రి ఆకస్మిక తనిఖీ చేపట్టారు. స్నేక్ గ్యాంగ్ లో ఏ-1 నిందితుడుగా ఉన్న ఫైజల్ దయాని ఇంట్లో ఒక స్కార్పియో, రెండు బైకులు స్వాధీనం చేసుకున్నారు. తనిఖీల్లో సైబరాబాద్ కమిషనర్ సీవీ ఆనంద్ స్వయంగా పాల్గొన్నారు. పోలిసులతో కలిసి ఆయన కూడా ఇళ్ళలో సోదాలు జరిపారు. స్నేక్ గ్యాంగ్ సహా ఇతర పద్దతుల్లో ప్రజలను భయపెట్టి డబ్బులు వసూలు చేయటం, వారిని వేధించటం వంటి చర్యలను అడ్డుకునేందుకే ఈ తనిఖీలు చేపట్టామని పోలిసులు వెల్లడించారు.

కార్తిక్