తుమ్మల రాజీనామా వెనుకున్న రహస్యం ఇదేనా..?

Posted: 09/01/2014 10:45 AM IST

(Image source from: the secret behind former tdp senior leader tummala nageswara rao resignation)

తెలుగుదేశం పార్టీ సీనియర్ నేత, మాజీమంత్రి తుమ్మల నాగేశ్వర రావు పార్టీకి రాజీనామా చేసి టీఆర్ఎస్ లోకి చేరిపోయిన సంగతి తెలిసిందే! అయితే ఆయన రాజీనామా చేయడంపై వచ్చిన వార్తల నేపథ్యంలో.. సీటుకోసం ఆశించే ఆయన రాజీనామా చేశారని ఎన్నో అనుమానాలు వ్యక్తమయ్యాయి. పైగా అన్ని ప్రాంతాల్లోనూ టీఆర్ఎస్ పార్టీ హవా రానురాను మరింతగా బలపడటంతో టీడీపీ బలం పూర్తిగా తగ్గిపోతోందనే భావనతోనే ఆయన పార్టీ వీడారన్న వార్తలు ఎన్నో వచ్చాయి.

టీడీపీ పార్టీ ఆవిర్భావం నుంచి పార్టీలోనే కొనసాగుతూ తనకంటూ ఒక ప్రత్యేకతను చాటుకున్నారు తుమ్మల నాగేశ్వరరావు! 1983 నుంచి టీడీపీలో క్రియాశీలక పాత్రను పోషించిన ఆయన ఇప్పుడు ఆ పార్టీకి గుడ్ బై చెప్పడంపై ఎన్నో అనుమానాలకు దారితీస్తోంది. దీనిపై ఆయన పార్టీకి స్పష్టతనివ్వాల్సిందేనంటూ ఒత్తిళ్లు ఎక్కువయిపోయాయి. దీంతో ఆయన తాజాగా టీడీపీ కార్యకర్తలతో సమావేశమయ్యారు. తాను పార్టీని వీడుతున్నందుకు ఎంతో బాధగా వుందని కన్నీటిపర్యంతమయ్యారు. ఖమ్మం జిల్లాలోని ఐదు నియోజకవర్గాలకు చెందిన కార్యకర్తలతో సమావేశమైన తుమ్మల... రాజీనామా వెనుకున్న రహస్యాన్ని కన్నీటితో వెలిబుచ్చారు.

ప్రజల కోరిక మేరకే తాను టీడీపీ పార్టీకి రాజీనామా చేశానని.. ఏనాడూ తాను సీటు కోసం ఆశించలేదని స్పష్టం చేశారు. తనపై వస్తున్న వదంతులు, వివాదాలను ఎవ్వరు నమ్మకండంటూ ఆయన పేర్కొన్నారు. టీడీపీ పార్టీకి తాను ద్రోహం చేయడం లేదని.. చాలాకాలం నుంచి తాను కొనసాగుతున్న పార్టీని ఇప్పుడు వీడుతున్నందుకు ఎంతో బాధగా వుందని ఆయన ఆవేదన వ్యక్తం చేశారు. ప్రజల సంక్షేమం కోసం తాను నిరంతరం పాటుపడతానని ఆయన అన్నారు.