‘‘అయ్యప్ప’’ను జలగండంలో ముంచేసిన టీఆర్ఎస్!

Posted: 08/23/2014 02:48 PM IST

Telangana water board increases the charges of water bill to ayyappa society

టీఆర్ఎస్ ప్రభుత్వం అధికారంలోకి వచ్చిన వెంటనే తెలంగాణాలో వున్న అక్రమ కట్టడాలను కూల్చివేసిన వేసిన సంగతి తెలిసిందే! అందులో భాగంగానే ముఖ్యంగా మాధాపూర్ లోని అయ్యప్ప సొసైటీ వాళ్లకు అయితే చుక్కలు చూపించేసింది! నిబంధనలకు విరుద్ధంగా నిర్మాణాలను చేపట్టారంటూ అయ్యప్ప సొసైటీ వాసులపై చర్యలకు ఉపక్రమించింది. ఎలాగూ ఈ కట్టడాలు నిబంధనలకు విరుద్ధంగా నిర్మించబడ్డాయంటూ మొన్నటికిమొన్న ట్రాన్స్ కో అధికారులు కరెంట్ బిల్లులు భారీగా పెంచేసి అక్కడి వాసులకు పెద్ద షాకే ఇచ్చింది. ఇప్పుడు తాజాగా అదే తరహాలో జలమండలి అధికారులు పయనించేందుకు సిద్ధమయ్యారు.

ఈసారి వారినుంచి వాటర్ బిల్లులను మూడు రెట్లు ఎక్కువగా వసూలు చేయాలని జలమండలి నిర్ణయం తీసుకుందని తాజా సమాచారం! ఆక్యుపెన్సీ సర్టిఫికెట్లు లేవనే ఆరోపణలతోనే జలమండలి అధికారులు ఇలా ఛార్జీల మోతకు దిగినట్లు తెలుస్తోంది. దీనికి సంబంధించి జలమండలి అధికారులు త్వరలోనే అయ్యప్ప సొసైటీకి నోటీసులు జారీచేయాలని నిర్ణయించారు. ఆక్యుపెన్సీ సర్టిఫికెట్ లేనివాళ్లంతా అధిక ఛార్జీలు చెల్లించాల్సి వుంటుందని ఆ నోటీసుల్లో పేర్కొంటున్నారు. అయితే.. కేవలం కక్ష సాధింపు చర్యల్లో భాగంగానే టీఆర్ఎస్ ప్రభుత్వం ఇలాంటి చర్యలకు దిగుతోందని.. తమను ఎలాగైనా ఈ సొసైటీ వెళ్లగొట్టాలనే నెపంతోనే ఇలా వ్యవహరిస్తోందని సోసైటీ వాసులు ఆరోపణలు చేస్తున్నారు.