పెళ్లి చేసుకోకుండా 58ఏళ్లు సహజీవనం చేసిన జంట!

Posted: 08/21/2014 03:09 PM IST

Senior citizens married after 58 years who are in live in relationship

ప్రస్తుతయుగంలో సహజీవనం కూడా ఒక ఆచారంగా మారిపోయింది. మొదట పాశ్చాత్తదేశాల్లో మొదలైన ఈ సంస్కృతి.. రానురాను మన భారతదేశంలో కూడా ఒక సంప్రదాయంగా మారిపోయింది. ఒకరికొకరు నచ్చితే చాలు.. తమకు ప్రపంచంతో పనిలేదన్నట్టు పెళ్లి చేసుకోకుండా జీవితం గడుపుతారు. ఒకవేళ తమ మధ్య ఏమైనా సమస్యలు ఏర్పడితే.. విడాకులు వంటి కోర్టు ఇబ్బందులు లేకుండా స్వచ్ఛందంగా విడిపోవచ్చు. ఇక నేటియువతర వ్యవహారం ఎలావుందో అందరికీ తెలిసిందే! తమకిష్టమొచ్చినట్లు వ్యవహరిస్తుంటారు. ప్రపంచంమొత్తం తమదే అన్నట్టు ఫీలింగ్ లో మునిగిపోతారు. ఇతరులు ఎలా వుంటే మనకేం.. మనం బాగున్నామా లేదా..? అంటూ ఎంజాయ్ చేస్తుంటారు. సంస్కృతీ - సంప్రదాయాలకు విరుద్ధంగా నిర్ణయాలు తీసుకుంటుంటారు. అటువంటి స్వేచ్ఛ తమకు జీవితాంతం కావాలనే ఆశతో సహజీవనాన్ని వాళ్లు అలవాటుగా మార్చుకున్నారు. అయితే ఇక్కడ మనం చదవబోయేది నేటియువతర సహజీవనం కథ కాదు.. దాదాపు 58ఏళ్ల క్రితం నాటిది!

విజయనగరం జిల్లా కురుపాంకు చెందిన రామస్వామి, శ్రీకాకుళం జిల్లా వీరఘట్టానికి చెందిన పోలమ్మ ఇద్దరూ అనుకోకుండా ఒక చోట కలుసుకున్నారు. అప్పటినుంచి ప్రేమలో మునిగిపోయిన వీరు పెళ్లి చేసుకోకుండానే సహజీవనం చేస్తున్నారు. ఇద్దరు మనసులు కలిశాయి కదా ఇక పెళ్లి ఎందుకులే అనుకున్నారో.. ఏమో.. వివాహం చేసుకోకుండా దాదాపు 58 ఏళ్లవరకు సహజీవనం చేశారు. ఈ మధ్యకాలంలో వీరికి నలుగురు పిల్లలు జన్మించారు. వారిక్కూడా పెళ్లిళ్లయి పిల్లలు పుట్టారు. అయినా కాలం సాఫీగా జరుగుతోంది కదా అని వీళ్లు పెళ్లి చేసుకోకుండా వుండిపోయారు. అయితే పెళ్లి చేసుకోలేదన్న నిరాశే వీరిని వెంటాడుతూనే వుంది. పెళ్లి చేసుకోకుండా ఇన్నాళ్లూ కాలం గడిపాం అన్న ఆవేదన వారిలో ఎప్పటికీ వుండేది. దీంతో వీరి ఆవేదనను గ్రహించిన వారి మనుమలు, మనువరాళ్లు ఇన్నాళ్లకు వీరికి పెళ్లి చేయాలని నిర్ణయించారు. దాంతో వీరికి బుధవారంనాడు వెంకన్న సన్నిధిలో కుటుంబసభ్యుల మధ్య పెళ్లి జరిపించారు. అయితే ఇన్నేళ్లూ పెళ్లి చేసుకోకున్నాక.. ఆదర్శ దంపతులకు వీరు మారుపేరుగా నిలిచిపోయారు.