మజ్లిస్ హటావో, బిజెపి జితావ్ - కిషన్ రెడ్డి

Posted: 08/21/2014 09:46 AM IST

భారతీయ జనతా పార్టీ తెలంగాణ శాఖ అద్యక్షుడు జి.కిషన్ రెడ్డి ఇప్పుడు మజ్లిస్ హటావో, బిజెపి జితావ్ నినాదంతో ముందుకు వెళతామని అంటూ టిడిపి గురించి ప్రస్తావించకపోవడం విశేషం.

ప్రస్తుతం తెలుగుదేశం ,బిజెపిలు మిత్రపక్షాలుగా ఉండగా, కిసన్ రెడ్డి టిడిపితో సంబంధం లేకుండా గ్రేటర్ హైదరాబాద్ మేయర్ పీఠం బిజెపి దక్కించుకుంటుందని ప్రకటిస్తున్నారు. అంటే ముందస్తుగానే టిడిపిని ఇరుకున పెట్టే ఉద్దేశ్యమో, లేక ఒకవేళ బిజెపితో పొత్తు కుదుర్చుకోవాలంటే మేయర్ పీఠాన్ని వదులుకోవాలన్న సంకేతం ఇవ్వడమో కాని ఇది రెండు పార్టీల మధ్య వివాదం కావచ్చు. బిజెపి అగ్రనేతలను చంద్రబాబు నాయుడు ఇటీవలి కాలంలో బాగా పొగుడుతున్నారు.అయినా కిషన్ రెడ్డి మాత్రం ఏకపక్షంగా మాట్లాడుతున్నారు. తెలంగాణలో టిడిపితో పొత్తు వద్దని గతంలో కూడా ఆయన వాదించారు..

బీజేపీ స్టార్ లీడర్, భారతీయ జనతాపార్టీ జాతీయ అధ్యక్షుడు అమిత్ షా తెలంగాణ రాష్ట్రంలో రెండు రోజులు పర్యటించున్నారు. గురువారం ఆయన హైదరాబాద్‌కి వస్తున్నారు. బీజేపీ అధ్యక్షుడిగా బాధ్యతలు స్వీకరించిన అనంతరం ఆయన మొదటిసారి దక్షిణాది రాష్ట్రానికి వస్తున్నారు. ఆయనకు ఘనమైన స్వాగతం పలకడానికి తెలంగాణ బీజేపీ భారీ ఏర్పాట్లు చేసింది. మధ్యాహ్నం మూడున్నర తర్వాత ఆయన హైదరాబాద్‌కి వస్తారు. ఆ తర్వాత సికింద్రాబాద్‌లోని ఇంపీరియల్ గార్డెన్స్‌లో జరిగే కార్యకర్తల సమావేశంలో పాల్గొంటారు. ఇదే వేదికమీద పలువురు బీజేపీలో చేరతారు. వారిలో కొంతమంది కాంగ్రెస్ పార్టీ కార్పొరేటర్లు కూడా వుంటారని తెలుస్తోంది.