సమగ్ర కుటుంబ సర్వేను విజయవంతం చేస్తేనే భవిష్యత్!

Posted: 08/18/2014 06:23 PM IST

తెలంగాణా రాష్ట్రవ్యాప్తంగా టీఆర్ఎస్ ప్రభుత్వం సమగ్ర కుటుంబ సర్వేను చేపట్టిన విషయం తెలిసిందే! ఈ విషయానికి సంబంధించి ఒక్కొక్కరు ఒక్కొక్క విధంగా తమతమ స్టేట్ మెంట్లను వెల్లడించారు. ఈ సర్వేలో రేషన్ కార్డు నుంచి బ్యాంక్ అకౌంట్ డీటెయిల్స్ వరకు అన్ని ఇస్తేనే చెల్లుతాయంటూ కొంతమంది టీఆర్ఎస్ నేతలు అప్పట్లో ప్రకటించగా... దానిని తిప్పికొడుతూ హైకోర్టు స్వచ్ఛందంగా ఈ సర్వేలో పాల్గొనేవారు పాల్గొనవచ్చు లేకపోతే లేదంటూ స్టేట్ మెంట్ ఇచ్చింది. అంటే.. అన్నీ వివరాలు కాకపోయినప్పటికీ.. కనీసం ఇంట్లో వున్న వ్యక్తుల సంఖ్య వారు చేస్తున్న ఉద్యోగ వివరాలు ఇచ్చుకోవాల్సింది వుంటుంది.. లేదా అది కూడా ఇవ్వనవసరం లేదంటూ కోర్టు ఆర్డర్లు జారీ చేసింది. అయితే పూర్తి వివరాలు ఇస్తేనే తెలంగాణాలో వున్న ప్రజలకు మంచి భవిష్యత్ వుంటుందని టీఆర్ఎస్ నేతలు ఇప్పటికీ వ్యాఖ్యానిస్తూనే వున్నారు.

ఇదిలావుండగా.. తాజాగా తెలంగాణ ముఖ్యమంత్రి ఈ సర్వే గురించి మాట్లాడుతూ.. సమగ్ర కుటుంబ సర్వేను తెలంగాణ ప్రజలు విజయవంతం చేయాలని ఆయన కోరారు. సర్వే చేసే అధికారులకు ప్రజలు పూర్తి సమాచారం అందించి.. సర్వేకు పూర్తి స్థాయిలో సహకరించాలని ఆయన అన్నారు. భవిష్యత్తులో ప్రజలకు సంక్షేమ పథకాలు అందించేందుకే ఈ సర్వేను నిర్వహిస్తున్నామని.. ఎవరి అవసరాలు ఏమిటో తెలుసుకుని దాని ప్రకారమే కొత్త ప్రణాళికలు తీసుకురావడం కోసమేని ఇలా చేయాల్సి వస్తోందని ఆయన స్పష్టం చేశారు. అంటే ఈయన కూడా ప్రజలు మంచి భవిష్యత్తును కోరుకోవాలంటే.. ఈ సర్వేలో పూర్తి సమాచారాలు అందించి, తమకు సహకరించాల్సిందిగా కోరుకుంటున్నట్లు తెలుస్తోంది. ఏదేమైనా ఈ సర్వేలో భాగం పంచుకోవడంలో మేలుంటుందని కొంతమంది విశ్లేషకులు అభిప్రాయాలు వ్యక్తం చేస్తున్నారు.