మోడీకి మించిన మొనగాళ్లు ప్రపంచంలోనే లేరట!

Posted: 08/01/2014 01:07 PM IST

ప్రస్తుతం భారతదేశ ప్రధానమంత్రిగా కొనసాగుతున్న నరేంద్రమోడీని మించి మొనగాళ్లు ఎవరూ లేరట! అయితే ఈ మాటలను వెల్లడించింది ఏ సర్వేలు కాదులెండి.. తెలంగాణ శాసనమండలి ఉపనేతగా వ్యవహరిస్తున్న షబ్బీర్ అలీ.. నరేంద్రమోడీని పొగుడుతూ ఈ విధంగా ప్రశంసించారు. మోడీలాంటి మంచి మనస్థత్వం, మతతత్వం వంటి ద్వేషాభావాలు లేని మంచి మనిషి అంజనం వేసి వెదికినా మన భారతదేశంలో లభించడు అని ఆయన అభిప్రాయాన్ని వ్యక్తం చేశాడు.

సీఎల్పీ కార్యాలయంలో షబ్బీర్ అలీ మీడియాతో మాట్లాడుతూ... తెలంగాణ, ఆంధ్రప్రదేశ్ రాష్ట్రాలకు ముఖ్యమంత్రులుగా వ్యవహరిస్తున్న కేసీఆర్, చంద్రబాబు నాయుడు స్వార్థపరులని ఆయన ఆరోపణలు వేశారు. వారి స్వార్థరాజకీయాల కారణంగానే రెండు రాష్ట్రాల్లో వున్న తెలుగుప్రజలు తీవ్రంగా నష్టపోతున్నారని వెల్లడించారు. ప్రజల్లో సెంటిమెంట్ ను రెచ్చగొట్టి వారిద్దరూ సీఎం పదవులను అధిష్టించారని, ఇకనుంచైనా తమ బుద్ధి మార్చుకుని, ప్రజలకు సేవచేసే దిశలో దృష్టిని కేంద్రీకరించాల్సిందిగా ఆయన సూచనలిచ్చారు.

ఈ నేపథ్యంలో అలీ మాట్లాడుతూ... ఇండియా, పాకిస్తాన్ దేశాల మధ్య ఏళ్లుగా శత్రుత్వం నడుస్తూనే వుంది. అయినా వాటిని పట్టించుకోకుండా ప్రధాని నరేంద్రమోడీ తన ప్రమాణస్వీకారానికి పాకిస్తాన్ ప్రధాని నవాజ్ షరీఫ్ ను ఆహ్వానించారు. బ్రిక్స్ దేశాల సదస్సులో కూడా మోడీ చైనా ప్రధానితోనూ కలిసి చర్చించారు. అంతటి మేధావి గల నరేంద్రమోడీ కంటే కేసీఆర్, చంద్రబాబులు మొనగాళ్లా..?’’ అని ఆయన ప్రశ్నిస్తూ తన ప్రసంగాన్ని ముగించేశారు.