బతుకు బుగ్గిపాలు చేసి-ఘాటైన హెచ్చరికలు?

Posted: 07/30/2014 08:19 AM IST

డీఐజీ సునీల్ పరస్కర్ అత్యాచారం చేశారని ముంబై పోలీసులను ఆశ్రయించిన మోడల్‌కు అజ్ఞాత వ్యక్తుల నుంచి బెదిరింపు కాల్స్ వస్తున్నాయి. డీఐజీపై పెట్టిన కేసును వాపసు తీసుకోవాలని ఒత్తిడి పెడుతున్నారు. తాము చెప్పిన పని చేయకపోతే ఎంతకైనా తెగిస్తామని హెచ్చరికలు చేస్తున్నారని ఆరోపిస్తూ మరోసారి ఠాణా గడపతొక్కింది సదరు మహిళ. తనకు ప్రాణరక్షణ కల్పించాలని మొరపెట్టుకుంది.

దీంతో స్పందించిన పోలీసులు ఆమెకు గట్టి బందోబస్తు ఏర్పాటు చేశారు. కేసును సీరియస్‌గా తీసుకున్న ముంబై పోలీసులు తీగ లాగేందుకు రెడీ అయ్యారు. మోడల్, డీఐజీ ఇద్దరి కాల్‌డేటా ద్వారా కూపీలాగేందుకు ప్రయత్నిస్తున్నారు. డీఐజీ సునీల్ పరస్కర్ వ్యక్తిగత సిబ్బందిని ప్రశ్నించాలని చూస్తున్నారు. అంతేకాదు ఆయన సన్నిహితులను విచారించనున్నారు. డీఐజీ దగ్గర పనిచేస్తున్న సిబ్బంది వివరాలు సేకరించి వారి వాంగ్మూలాలు నమోదు చేయనున్నట్లు ముంబై సీపీ రాఖేష్ మారియా తెలిపారు.

2013లో పరస్కర్‌ తనపై పదే పదే పైశాచికంగా అత్యాచారం చేశాడని ఫిర్యాదులో మోడల్‌ వెల్లడించింది. నార్త్ జోన్‌ ఏసీపీగా పరస్కర్‌ పనిచేస్తున్న సమయంలో తన పట్ల హేయంగా ప్రవర్తించాడని వాపోయింది. ఓ కేసు విషయంలో న్యాయం కోసం ఆశ్రయిస్తే తన బతుకు బుగ్గిపాలు చేశాడంది. ఇళ్లు చూపిస్తానని ఒకసారి, మధు ఐలాండ్‌లో ఉచితంగా ఫోటో షూట్‌కు అవకాశం ఇప్పిస్తానని మరోసారి తనతో లైంగిక వాంఛలు తీర్చుకున్నాడని తెలిపింది. హోటల్‌లో మత్తుమందు ఇచ్చి బలాత్కరం చేసి, ఆ తర్వాత బ్రోతల్‌ కేసు కింద అరెస్ట్ చేశాడంది. కేసును ఛాలెంజింగ్‌గా తీసుకున్న ముంబై పోలీసులు త్వరలోనే ఛేదించేందుకు చర్యలు తీసుకుంటున్నారు.

RS