అమ్మ బాబోయ్! పెట్రోల్ ధరలు ఇంతగా తగ్గిస్తున్నారా..?

Posted: 07/28/2014 11:13 AM IST

‘‘పెట్రోల్’’ సహాయంతో నడిచే వాహనాదారులకు త్వరలోనే ఒక శుభవార్త రానుంది. దేశవ్యాప్తంగా పెట్రోల్ ధరలను తగ్గించాలని ఆయిల్ కంపెనీలు నిర్ణయం తీసుకున్నట్టు తాజా సమాచారం! గత కొన్ని రోజుల నుంచి అంతర్జాతీయంగా చమురు ధరలు తగ్గుముఖం పట్టడం వల్ల ఈ నిర్ణయానికి వచ్చినట్లు వారు తెలుపుతున్నారు. ఇంకొన్నాళ్లవరకు ఇదే వ్యవహారం కొనసాగితే... పెట్రోల్ ధరలను తగ్గించడం ఖాయమని వారు ఖరాఖండీగా చెబుతున్నారు.

అయితే మరీ ఎక్కువ సంబరపడిపోకండి సుమా! ఆయిల్ కంపెనీలు పెట్రోల్ ధరలను కేవలం 1 రూపాయి మాత్రమే తగ్గించనున్నట్టు పేర్కొంటున్నాయి. అంతేకాదు బాబోయ్... ఈ విషయం మీద కేంద్రప్రభుత్వంతో మాట్లాడిన తరువాతే తుదినిర్ణయం తీసుకుంటామని సదరు కంపెనీలు స్పష్టం చేశాయి. ఒకవేళ ఈ నిర్ణయం మీద కేంద్రప్రభుత్వం ఓకే అని వెల్లడిస్తే... ఏప్రిల్ తరువాత పెట్రోల్ ధరలు.. అదికూడా 1 రూపాయి మాత్రమే తగ్గించనున్నట్టు అధికారులు వెల్లడిస్తున్నారు.

ఈ విషయం తెలుసుకున్న కొంతమంది విశ్లేషకులు.. ‘‘అమ్మ బాబోయ్.. పెట్రోల్ ధరలు మరీ ఇంతగా తగ్గిస్తే.. జనాలు సంతోషంతో మూర్ఛపడిపోరూ’’ అని సెటైర్లు వేయడం మొదలుపెట్టారు. మరీ విడ్డూరం కాకపోతే... పెట్రోల్ ధరలు 1 రూపాయి మాత్రమే తగ్గించడం కాకుండా.. దానిమీద కేంద్రంతో మీటింగులు.. ఒకవేళ సక్సెస్ అయితే ఏప్రిల్ తరువాత! మరి దీనిమీద మీ అభిప్రాయమేంటి..?