కార్మికుల సొమ్ము రూ. 300 కోట్లు వాడుకున్న ఆర్టీసీ !

Posted: 07/27/2014 01:42 PM IST

కార్మిక సంక్షేమ నిధి నుంచి రూ.300 కోట్లు వాడుకున్న ఆర్టీసీ యాజమాన్యం మీద నిరసన చూపుతూ ఆంధ్రప్రదేశ్, తెలంగాణా రాష్ట్రాలలో ఆగస్ట్ 2 నుంచి సమ్మె చెయ్యబోతున్నారు ఆర్టీసి కార్మికులు.  

ఈమేరకు రెండు రాష్ట్రాలలోను సమ్మెకు పిలుపునిచ్చిన ఎంప్లాయీస్ యూనియన్ జూలై 30 నుంచి ఆగస్ట్ వరకు విజయవాడ, హైద్రాబాద్ లలో మహా దీక్షను చేపట్టనున్నారని తెలియజేసారు. ఎంప్లాయీస్ యూనియన్ కార్యదర్శి కె.రాజారెడ్డి హైద్రాబాద్ లోను, ఉప కార్యదర్శి వై.వి.రావు విజయవాడలోను మహా నిరాహార దీక్షలు చేపట్టనున్నారు.

ప్రభుత్వం నుంచి రావలసిన రాయితీ సకాలంలో అందకపోవటంలో అత్యవసర పరిస్థితుల్లో ఆ సొమ్మును వాడుకోవలసి వచ్చిందని చెప్పిన ఆర్టిసి ఎండి పూర్ణచంద్రరావు తిరిగి ఇవ్వటానికి ఎటువంటి సమయాన్ని కానీ హామీని కానీ ఇవ్వకపోవటంతో ఎంప్లాయీస్ యూనియన్ సమ్మెకు దిగుతున్నారు.

ఆర్టీసీ కార్మికులకు కో ఆపరేటివ్ క్రెడిట్ సొసైటీ, స్టాఫ్ బెనెఫిట్ ట్రస్ట్, స్టాఫ్ రిటైర్ మెంట్ బెనెఫిట్ స్కీం లద్వారా కార్మికులు ఋణాలను పొందుతుంటారు.  వాళ్ళ దగ్గర్నుంచి జీతాలలో కట్ చేసిన ఆర్టీసీ యాజమాన్యం ఆ సొమ్మును తన అవసరాలకు వాడుకుంది కానీ ఆయా సోసైటీలకు చెల్లించలేదు.  నాలుగు నెలలుగా ఇలా జరుగుతుండటంతో ఆ సొసైటీలు కార్మికులకు సంక్షేమ కార్యక్రమాలు నిలిపివేయటం జరిగింది.  దానితో ఋణాల కోసం దరఖాస్తులు పెట్టుకున్న 18 వేల కార్మికులకు ఆ సొసైటీల నుంచి ఆర్థిక సాయం రావటం అందటం లేదు.

రంజాన్ లోపులో ఆర్టీసీ ఆ మొత్తాన్ని చెల్లించకపోతే 30 నుంచి నిరాహార దీక్షలు, ఆగస్ట్ 2 నుంచి సమ్మెలు తప్పవంటున్నారు ఎంప్లాయీస్ యూనియన్ నాయకులు.

-శ్రీజ