రాజ్యసభలో పోలవరం బిల్లు!

Posted: 07/14/2014 03:02 PM IST

లోక్ సభలో పాసైన పోలవరం ప్రాజెక్ట్ మీద ఆర్డినెన్స్ ను హోం మంత్రి రాజ్ నాథ్ సింగ్ ఈరోజు రాజ్యసభలో ప్రవేశపెట్టారు.  

దీని మీద తెలంగాణా రాష్ట్ర సమతి నాయకుడు కె కేశవరావు అభ్యంతరాలు తెలపటంతో దీని మీద చర్చ ప్రారంభమైంది.  ఈ ఆర్డినెన్స్ లో పోలవరం ముంపు ప్రాంతాలను ఆంధ్రప్రదేశ్ రాష్ట్రంలో కలపటం మీద తెలంగాణా ప్రభుత్వం వ్యతిరేకిస్తోంది.  రాష్ట్రాల ఎల్లలను రాష్ట్ర ప్రభుత్వ అనుమతి లేకుండా మార్చివేయటం సరికాదని, అది రాజ్యాంగ విరుద్ధమని వాదించిన తెలంగాణా, ఒడిశా, ఛత్తీస్ గఢ్ లోక్ సభ సభ్యుల అభ్యంతరాలను లోక్ సభ స్పీకర్ పరిగణనలోకి తీసుకోలేదు.  దాని మీద న్యాయపోరాటం చెయ్యటానికి సుప్రీం కోర్టుందని స్పీకర్ తెలియజేసారు.  

రాజ్యసభలో జరుగుతున్న చర్చలో జైరాం రమేశ్ మాట్లాడుతూ, తాను స్వయంగా ఆ ప్రాజెక్ట్ ని చూసానని, అది బహుళార్థ సాధక ప్రాజెక్ట్ అనటంలో ఎటువంటి సందేహమూ లేదని అన్నారు.  అది ఆంధ్రప్రదేశ్ ప్రాజెక్ట్ కాబట్టి ఆ రాష్ట్రమే ముంపు ప్రాంతాలలోని ప్రజలకు పునరావాసం కల్పిస్తుందని అన్న జైరాం రమేశ్, ఇప్పటికే మొత్తం అంచనాలో 32 శాతం ఖర్చయిందని కూడా తెలియజేసారు.  

జైరాం రమేశ్ ప్రసంగాన్ని అడ్డుకోవటానికి విహెచ్, ఇతర సభ్యులు ప్రయత్నించగా రాజ్యసభ డెప్యూటీ ఛైర్మన్ కురియన్ పరిస్థితిని చక్కదిద్ది చర్చను కొనసాగేట్టుగా చేసారు.   చివరగా జైరాం రమేష్ పోలవరం ప్రాజెక్ట్ కి పూర్తి మద్దతుని తెలియజేసారు.  కేవలం ముంపు ప్రాంతాలకు న్యాయం చెయ్యటం కోసం మాత్రమే వాటిని ఆంధ్రప్రదేశ్ లో కలపటం జరిగిందని, ఈ నిర్ణయం గత ప్రభుత్వం తీసుకున్నదేనని తెలియజేస్తూ, అప్పటి ప్రధానమంత్రి మన్మోహన్ సింగ్ రాజ్యసభలో చేసిన ప్రకటనను చదివి వినిపించారు.

-శ్రీజ