చంద్రబాబు అడుగుజాడల్లో నడుస్తున్న కేసీఆర్

Posted: 07/11/2014 01:03 PM IST

(Image source from: kcr following chandrababu naidu)

‘‘నువ్వా - నేనా’’ అని ఎప్పుడూ మాటల తూటాలతో తిట్టుకునే ఆంధ్ర, తెలంగాణ మంత్రుల్లో ఈ మధ్య కొంచెం మార్పు కనిపిస్తున్నట్టు తెలుస్తోంది. మొన్నటికి మొన్న చంద్రబాబు నీటి విషయంపై కేసీఆర్ కు లేఖ రాస్తానని ప్రకటించిన ఆయన... ఇప్పుడు తాజాగా కేసీఆర్ కూడా బాబు బాటలోనే నడుస్తున్నట్టు కనిపిస్తోంది. రుణాల రీషెడ్యూల్ కు ఆర్బీఐ వ్యతిరేకించిన నేపథ్యంలో బాబు, కేసీఆర్ లకు నిద్రలేకుండా టెన్షన్ పట్టుకుంది. అయితే బాబు మాత్రం వెనక్కు తగ్గకుండా రుణమాఫీ రీషెడ్యూల్ కోసం ప్రయత్నాలు చేస్తూనే వున్నారు.

రైతుల రుణమాఫీల విషయంలో ఇటు తెలంగాణా, అటు ఆంధ్రా ముఖ్యమంత్రుల్లో నెలకొన్ని టెన్షన్ అంతా ఇంతా కాదు. చంద్రబాబు నాయుడు అయితే ఎడతెరపి లేకుండా ప్రయత్నాలు చేస్తూనే వున్నారు. ఎంత ఇబ్బంది అయినా ఫర్వాలేదు... రైతు రుణాలను మాఫీ చేయడం కోసం కూలీపనివాడిలాగా పనిచేస్తానని పేర్కొన్న బాబు... అన్న మాట ప్రకారం కష్టపడుతూనే వున్నారు. చివరకు ఈయన కష్టానికి ఫలితం దక్కినట్లుగా కనిపిస్తోంది. బాబు చేస్తున్న ప్రయత్నాల ఫలితంగా ఆర్బీఐ రీషెడ్యూల్ కు అంగీకరించినట్లు వార్తలు వస్తున్నాయి.

ఈ నేపథ్యంలోనే తాజాగా ఏపీ ఆర్థికశాఖ ముఖ్య కార్యదర్శి అయిన అజేయకల్లం రైతురుణాల వివరాలతో ఆర్బీఐ వద్దకు వెళ్లనున్నట్టు వార్తలు వస్తున్నాయి. దీంతో సీఎం కేసీఆర్ కు ఊరట లభించింనట్లు తెలుస్తోంది. చంద్రబాబు సర్కారు రుణమాపీపై చేస్తున్న కసరత్తు పూర్తయ్యేంతవరకు టెన్షన్ పడాల్సిన అవసరం లేదని ఆయన వ్యాఖ్యానించినట్టు చెబుతున్నారు. ‘‘వారు చేస్తున్న పనిని చేయనివ్వండి. ఆర్బీఐ వాళ్లకు ఎలాంటి వెసులుబాటు కల్పిస్తే.. దానికోసం మనం కూడా పట్టపడదాం’’ అన్న ధోరణితో కేసీఆర్ సర్కార్ వ్యవహరిస్తున్నట్టు కనిపిస్తోందని పలువురు గుసగుసలాడుకుంటున్నారు.

నిజానికి ఇక్కడ రైతు రుణభారం ఎక్కువగా వున్న చంద్రబాబు నాయుడుకే. కేసీఆర్ కు రుణభారం చాలా తక్కువ. పైగా ఆయన కేవలం లక్ష రూపాయల వరకే మాఫీ హామీ ఇచ్చారు. దీంతో పదేపదే ఆర్బీఐ దగ్గరకు వెళ్లాల్సిన అవసరం లేదని భావించిన కేసీఆర్... బాబు చేస్తున్న కసరత్తు అనంతరం తమకు కూడా అటువంటి ఫలితాన్ని కల్పించాల్సిందిగా కరితే బాగుంటుందని చెప్పినట్లు రాజకీయవర్గాలు చెప్పుకుంటున్నారు. అంటే.. ‘‘కేసీఆర్, చంద్రబాబు బాటలో నడుస్తున్నారన్నమాట!’’ అని అందరూ చర్చించుకుంటున్నారు.