ఎమ్మెల్యే ట్రైనింగ్- కేవలం ఎమ్మెల్యేలకే ప్రవేశం

Posted: 07/11/2014 12:51 PM IST

సుశిక్షితులైన శాసన సభ్యుల వలన వాళ్ళలో అవగాహన కలుగజేయటమే కాకుండా వాళ్ళనుంచి సంపూర్ణ సహకారాన్ని కూడా ఆశించవచ్చని తలచిన ఆంధ్రప్రదేశ్ ప్రభుత్వం శాసన సభ్యలకు శిక్షణా తరగతులను నిర్వహిస్తోంది.  ఆంధ్రప్రదేశ్ స్పీకర్ కోడెల్ శివప్రసాద్ మీడియా ప్రతినిధులతో మాట్లాడుతూ 18, 19 తేదీల్లో శాసన సభ్యులకు ఈ అవగాహనా తరగతులుంటాయని తెలియజేసారు.

పూర్వకాలం విద్యార్థులు నేరుగా స్కూళ్ళల్లో ప్రవేశాన్ని పొందేవారు.  ఇప్పుడు ప్రీ స్కూలింగ్, నర్సరీల పేరుతో స్కూల్ నిబంధనలకు విద్యార్థులను ఎలాగైతే తయారు చేస్తున్నారో అదే విధంగా శాసనసభ్యులకు కూడా సరైన అవగాహన కలిగిస్తూ శిక్షణనిచ్చినట్లయితే సభా మర్యాద తగ్గిపోకుండా, సభా సమయం వృధా కాకుండా ఉండటం, తద్వారా ప్రజాధనం కూడా ఆదా అవటం జరుగుతుంది.  ఈ అవగాహనా కార్యక్రమంలో సభ్యులకు అవగాహనను కలిగించటానికి రాజకీయ ప్రముఖులు, మంత్రులు, సుమిత్రా మహాజన్, అరుణ్ జైట్లీ, వెంకయ్యనాయుడు, నజ్మా హెప్తుల్లా, వినోద్ రాయ్, సుబాష్ కశ్యప్ ఇక్కడికి రాబోతున్నారు.

నిజానికి ఇలాంటి ట్రైనింగ్ ఎమ్మెల్యేగా పోటీ చెయ్యకముందే ఉండాలి కానీ ఎవరు గెలుస్తారో చెప్పలేం కాబట్టి కనీసం పోటీలో గెలిచిన తర్వాతైనా ఉండటం వాంఛనీయం.  

-శ్రీజ