జగన్, టీడీపీ యాత్రలకు చెక్ పెట్టే మాస్టర్ ప్లాన్?

Posted: 07/15/2017 03:01 PM IST

ఏపీ రాజకీయాల్లో మరో కీలక మార్పు చోటుచేసుకోబోతుందా? జగన్ పాదయాత్ర నేపథ్యంలో అంతకంటే పవర్ ఫుల్ ఆయుధాన్నే పవన్ వాడబోతున్నాడా? 2019 ఎన్నిక‌ల్లో జ‌న‌సేన గెలుపు కోసం రంగంలోకి దిగబోతున్నాడా? అవుననే అంటున్నాయి ఆయన సన్నిహిత వర్గాలు. అందుకోసం రథయాత్ర చేయబోతున్నాడని విశ్వసనీయ వర్గాల సమాచారం.

పార్టీ విస్తరణతోపాటు, ప్ర‌చారాన్ని ఒకేసారి మొద‌లు పెట్టే యోచ‌న‌లో ప‌వ‌న్ ఉన్న‌ట్టు చెబుతున్నారు. సెప్టెంబ‌ర్ 2న పవన్ పుట్టిన రోజు, అదే తేదీన అనంత‌పురం నుంచి ర‌థయాత్రను ప్రారంభించ‌నున్న‌ట్టు స‌మాచారం. ఇంతకు ముందు కేవలం ఏపీ వరకే దృష్టిసారించిన పవన్, ఇప్పుడు తెలుగు రాష్ట్రాల్లోనూ ప్ర‌జ‌ల వ‌ద్ద‌కు ప్ర‌త్య‌క్షంగా వెళ్లి వారి స‌మ‌స్య‌ల గురించి తెలుసుకునే ఉద్దేశ్యంలో ఉన్నాడు. ఇంతకు ముందు జ‌న‌సేన స‌భ‌ల్లో, పార్టీ అంతర్గత మీటింగ్ లలో ప‌వ‌న్ చాలాసార్లే ఈ విషయం చెప్పాడు కూడా.

ఇక ర‌థ‌యాత్ర లో కూడా ఏపీ ప్ర‌త్యేక హోదా సాధ‌న అంశాన్నే ప్రధాన ఆయుధంగా చేసుకుని పార్టీలపై విరుచుపడే ఛాన్స్ ఉంది. ఓవైపు వైఎస్సార్‌సీపీ అధినేత జ‌గ‌న్ పాద‌యాత్ర అక్టోబ‌ర్ 27 నుంచి ప్రారంభం కానుంది. గతంలో పవన్ కూడా తాను పాదయాత్ర చేస్తానంటూ ఓ ప్రకటన చేశాడు. ఈ నేపథ్యంలో జగన్ అడ్వాన్స్ అయిపోయాడు. మరోవైపు టీడీపీ ఇంటింటికి పాదయాత్ర పేరుతో సీన్ లోకి వచ్చేసింది. దీంతో పవన్ వేరే పంథాలో ముందుకెళ్లాలని భావిస్తున్నట్లు అర్థమౌతోంది. ఆ లెక్కన అంద‌రికంటే ముందు ఎన్నిక‌ల ప్ర‌చారాన్ని పవనే ప్రారంభించినట్లయ్యి ప్రజల దృష్టిలో పడుతుంది. అయితే వైసీపీ, టీడీపీలు వ్యూహాలకు పదును పెడుతున్న క్రమంలో పవన్ ఒరవడి ప్రజలను ఏమేర ఆకట్టుకుంటుందనే ఆసక్తిగా మారింది.