మరో కాంగ్రెస్ గూటిపిట్ట తుర్రుమంటోందా..?

Posted: 05/30/2015 11:31 AM IST

ఏపిలో కాంగ్రెస్ పార్టీ మరో వికెట్ డౌన్ అవుతోందా..? అంటే పరిస్థితులు మాత్రం అవుననే అన్నట్లున్కనాయి. కాంగ్రెస్ పార్టీలో ఎంతో కీలకంగా వ్యవహరించిన మాజీ పీసీసీ అధ్యక్షుడు, మాజీ మంత్రి బొత్స సత్య నారాయణ వైఎస్‌ఆర్‌ కాంగ్రెస్‌ పార్టీలో చేరేందుకు రంగం సిద్దం చేసుకుంటున్నట్లు తెలుస్తోంది. వైకాపా కీలక నేతలు విజయసాయిరెడ్డి, వైవీ సుబ్బారెడ్డి, మిథున్‌రెడ్డి, జ్యోతుల నెహ్రూ తదితరులు బొత్స ఇంటికి వెళ్లి సంప్రదింపులు జరిపారు. గత ఏడాది జరిగిన సార్వత్రిక ఎన్నికల్లో ఆంధ్రప్రదేశ్‌లో అధికారాన్ని ఆశించి భంగపడిన వైకాపా, ప్రధాన ప్రతిపక్ష హోదాను దక్కించుకుంది. కానీ ఏడాది కాలంగా అధికార పార్టీని సమర్థవంతంగా ఎదుర్కోలేకపోతుందని, ప్రధాన ప్రతిపక్ష పాత్రను పోషించలేకపోతుందనే విమర్శలు వినిపిస్తున్నాయి.

కొంతకాలం క్రితం బొత్స వైకాపాలో చేరుతున్నట్లు మీడియాలో కథనాలు వచ్చినా, ఆయన ఆ వార్తలను ఖండించారు. తాను కాంగ్రెస్‌లోనే కొనసాగుతానని చెప్పుకొచ్చారు. అయితే  వైకాపా నేతలు బొత్సతో సంప్రదింపులు జరిపిన నేపథ్యంలో ఇక బొత్స వైకాపా కండువా కప్పుకోవడానికి రంగం సిద్దమైనట్లు తెలుస్తోంది. శనివారం వైకాపా అధ్యక్షుడు వైఎస్‌ జగన్‌తో బొత్స భేటీ కానున్నట్లు సమాచారం. జూన్‌ 3,4 తేదీలలో మంగళగిరిలో వైఎస్‌ జగన్‌ నిర్వహించనున్నట్లు సమరదీక్షకు బొత్స కూడా హాజరయ్యే అవకాశాలు కనిపిస్తున్నాయి. సమరదీక్షలోనే బొత్స వైకాపా తీర్థం పుచ్చుకునే అవకాశాలు ఉన్నట్లు తెలుస్తోంది.

బొత్స సత్యనారాయణను వైకాపాలో చేర్చుకుని, ఆయనకు శాసనమండలిలో ప్రతిపక్ష నేతగా ఎంపిక చేసే అవకాశాలు కనిపిస్తున్నాయి. శాసనమండలిలో వైకాపాకు ప్రాతినిధ్యం ఉన్నప్పటికీ మండలిలో తమ గళం వినిపించడంలో వైకాపా విఫలమైందనే ఆరోపణలు ఉన్నాయి. ఈ నేపథ్యంలో మండలిలో తమ గళం వినిపించేందుకు బలమైన నేత కావాలని భావిస్తున్న వైకాపా, అందుకు బొత్సనే సమర్థుడైన నాయకుడని భావిస్తున్నట్లు తెలుస్తోంది. సుధీర్ఘ రాజకీయ అనుభవం ఉన్న బొత్స మండలిలో అధికార పార్టీని సమర్థవంతంగా ఎదుర్కోగలుగుతారని వైకాపా అంచనా వేస్తున్నట్లు తెలుస్తోంది.

*అభినవచారి*