డబ్బుతో సెటిల్ చేయాలని బాబు పన్నాగం : రోజా

Posted: 08/04/2015 03:11 PM IST

తెలుగుదేశం పార్టీపై నిత్యం ఉగ్రరూపం దాల్చే వైకాపా ఎమ్మెల్యే రోజా.. తాజాగా మరోసారి తీవ్రస్థాయిలో వ్యాఖ్యలు చేశారు. ఆంధ్రరాష్ట్రంలో సంచలనం సృష్టించిన వనజాక్షి, రిషితేశ్వరి ఘటనలను డబ్బుతో సెటిల్ చేయాలని ముఖ్యమంత్రి చంద్రబాబు ప్రయత్నాలు చేస్తున్నారని ఆమె ఆరోపించారు. ఇది అత్యంత దారుణమైన చర్య అని ఆమె అభిప్రాయపడ్డారు.

ఈరోజు (మంగళవారం) తిరుపతిలో యాంటీ ర్యాగింగ్ పోస్టర్ ను విడుదల చేసిన సందర్భంగా రోజా మాట్లాడుతూ.. చంద్రబాబు పాలనలో మహిళలకు రక్షణ కరువైందని అన్నారు. రిషితేశ్వరి ఘటనపై హోంమంత్రి చినరాజప్ప ఇంతవరకు ఎందుకు స్పందించలేదని మండిపడ్డారు. రిషితేశ్వరి ఘటనపై సిట్టింగ్ జడ్జితో విచారణ జరిపించాలని, నాగార్జున యూనివర్సిటీ వీసీని, ప్రిన్సిపల్ ను తక్షణం అరెస్ట్ చేయాలని ఆమె డిమాండ్ చేశారు. లేకపోతే పరిణామాలు మరింత తీవ్రం అవుతాయని ఆమె హెచ్చరించారు.

ఇదిలావుండగా.. ఇసుక మాఫియాలో ఎమ్మార్వో వనజాక్షికి ఓ ఎమ్మెల్యే నుంచి ఇబ్బందికరమైన పరిస్థితులు ఎదురైన విషయం తెలిసిందే. ఇప్పుడు తాజాగా ఆమెను చంపేస్తామంటూ ఓ లేఖ అందింది. అటు.. రిషితేశ్వరి ర్యాగింగ్ భూతాన్ని తాళలేక ఆత్యహత్య చేసుకున్న సంగతి విదితమే!