దిగ్విజయ్ ఓ లోఫర్ : డీఎస్

Posted: 07/02/2015 01:02 PM IST

D srinivas controversial comments digvijay singh trs party congress leaders

కాంగ్రెస్ సీనియర్ నేత డీ.శ్రీనివాస్ పార్టీని వీడుతున్నారని వార్తలు వచ్చిన నేపథ్యంలో ఏఐసీసీ ప్రధాన కార్యదర్శి దిగ్విజయ్ సింగ్ ఆయనపై మండిపడ్డారు. ఎన్నికల్లో డీఎస్ ఓటమి పాలైనా అతనికి కాంగ్రెస్ ఎమ్మెల్సీ పదవి ఇచ్చిందని, ఆయన సీనియారిటీని చూసి తాము పదవులిచ్చి గౌరవించామని డిగ్గీరాజా పేర్కొన్నారు. అలాగే.. డీఎస్ ప్రతిపాదించిన ఆకుల లలితకు ఎమ్మెల్సీ పదవి ఇప్పించామని ఆయన అన్నారు. ‘ఇంతగా కాంగ్రెస్ గౌరవించిన ఆయనకు.. ఇంకేం చేయాలి?’ అని ప్రశ్నించారు. చివరగా డీఎస్ ఓ ‘అవకావవాది’ అని డీఎస్ పై డిగ్గీరాజా ఆగ్రహంతో విరుచుకుపడ్డారు.

ఈ విధంగా డిగ్గీరాజా చెప్పిన వ్యాఖ్యలపై డీఎస్ కూడా ఘాటుగానే స్పందించారు. ఆయనకు డిగ్గీపై విమర్శనాస్త్రాలు సంధించారు. తాజాగా హైదరాబాద్ లో మీడియాతో మాట్లాడిన డీఎస్.. డిగ్గీరాజా చేసిన వ్యాఖ్యలపై తీవ్రస్థాయిలో విరుచుకుపడ్డారు. దిగ్విజయ్ తనపట్ల దిగజారి మాట్లాడారని, వందల బీఫామ్ లు ఇచ్చిన తనకు ఎమ్మెల్సీ పదవి ఒక లెక్క కాదని డీఎస్ చెప్పారు. చెప్పుడు మాటలు విని మాట్లాడుతున్న దిగ్విజయ్ ‘ఓ లోఫర్’ అని తీవ్ర వ్యాఖ్యలు చేశారు. ‘తన గురించి మాట్లాడటానికి దిగ్విజయ్ కి ఎంత ధైర్యం?’ అని ఆగ్రహం వ్యక్తం చేశారు. ఆకుల లలితకు ఎమ్మెల్సీ పదవి ఇవ్వడంపై తనకు ఎలాంటి అభ్యంతరం లేదని వెల్లడించారు. కాంగ్రెస్ లో తనకు ఎన్నో పదవులు వచ్చాయని.. అవమానాలు కూడా ఎదురయ్యాయని తెలిపారు.

ఇక ఈ క్రమంలోనే డీఎస్ తాను టీఆర్ఎస్ పార్టీలో చేరుతున్నానని స్పష్టం చేశారు. తెలంగాణ అభివృద్ధి కోసం మాత్రమే తాను టీఆర్ఎస్ పార్టీలో చేరుతున్నానని, అయితే కాంగ్రెస్ పార్టీని వీడటం ఎంతో బాధిస్తోందని అన్నారు. 1969లో గాంధీభవన్ లో అడుగుపెట్టానని గుర్తుచేసుకున్న ఆయన.. 2000లో తెలంగాణ గురించి అసెంబ్లీలో మాట్లాడానని చెప్పారు. కాంగ్రెస్ పార్టీలో తనకు ఎన్నో అవకాశాలు కల్పించిన అధినేత్రి సోనియాకు జీవితాంతం రుణపడి వుంటానని అన్నారు. తాను పదవులు ఆశించి టీఆర్ఎస్ లో చేరడం లేదని, రాష్ట్ర అభివృద్ది కోసమే పార్టీలో చేరుతున్నానని డీఎస్ తెలిపారు.