‘కారు’ స్పీడును ‘సైకిల్’ అందుకోలేకపోతోంది : కవిత

Posted: 05/18/2015 03:29 PM IST

తెలంగాణ సీఎం కేసీఆర్ కుమార్తె, నిజామాబాద్ ఎంపీ కల్వకుంట్ల కవిత అప్పుడప్పుడు తనదైన శైలిలో కొన్ని వ్యాఖ్యలు చేస్తూ వార్తల్లో నిలుస్తుంటారు. ఇప్పుడు తాజాగా మరోసారి ఆ విధంగా ఆసక్తికర వ్యాఖ్యలు చేసి వార్తల్లోకెక్కారు. సాధారణంగా చెప్పుకోవాలంటే ఇటు టీఆర్ఎస్, అటు టీడీపీ పార్టీ మధ్య అంతగా సఖ్యత సంబంధాలు లేవన్న విషయం తెలిసిందే! దీంతో ఆ రెండు పార్టీలు ఒకదానిపైమరొకటి విమర్శలు చేసుకుంటుంటాయి. ఆ పార్టీ నేతలూ తమతమ స్టైల్లో ఆరోపణలు చేసుకోవడం, కొన్ని వ్యవహారాల్లో బేరీజు వేసుకుని ఎద్దేవాలు చేయడం సర్వసాధారణం అయిపోయింది. ఈ తరహాలోనే కవిత ప్రత్యర్థి పార్టీలపై విరుచుకుపడ్డారు.

మొదట టీడీపీ పార్టీ గురించి కవిత మాట్లాడుతూ.. టీఆర్ఎస్ వేగాన్ని టీడీపీ అందుకోలేకపోతోందన్న మాటను చెప్పేందుకు ‘కారు స్పీడును సైకిల్ అందుకోలేకపోతోంది’ అని పదప్రయోగం వాడారు. తెలంగాణ రాష్ట్రంలో టీఆర్ఎస్ పార్టీ అన్నివిధాల దూసుకుపోతోందని.. చెప్పిన హామీలను సమర్థవంతంగా నెరవేర్చడంలో పార్టీ ముందుందని ఆమె అన్నారు. అలాగే.. సరికొత్త విధానాలు అవలంబిస్తూ ప్రజలకు అనుకూలంగా వుండేవిధంగా ప్రణాళికలు చేపడుతున్నామన్న అభిప్రాయాన్ని వెల్లడించారు.

ఇక ఈ క్రమంలోనే కాంగ్రెస్ పార్టీ మీద ఆమె వ్యాఖ్యలు చేశారు. ఇటీవలే కాంగ్రెస్ పార్టీ ఉపాధ్యక్షుడు రాహుల్ గాంధీ తెలంగాణలో జరిపిన పర్యటనపైనా ఆమె వ్యంగ్యాస్త్రాలు సంధించారు. తెలంగాణలో రాహుల్ పర్యటన పిక్నిక్ కు వచ్చి వెళ్లినట్లుగా వుందని ఆమె వ్యాఖ్యానించారు. తెలంగాణ రాష్ట్ర అభివృద్ధిలో శరవేగంగా దూసుకెళుతోందని.. త్వరలోనే గుజరాత్ ను అధిగమిస్తాని ధీమా వ్యక్తం చేశారు.