రాహుల్ ని పిలిచి అవమానించారు : తుమ్మల

Posted: 05/16/2015 04:02 PM IST

కాంగ్రెస్ ఉపాధ్యక్షుడు రాహుల్ గాంధీ ‘రైతు భరోసా యాత్ర’ పేరిట ఆదిలాబాద్ జిల్లాలో పర్యటించిన విషయం తెలిసిందే! అయితే.. ఈయన పర్యటనపై తెరాస రకరకాలుగా విమర్శలు గుప్పించారు. రాహుల్ యాత్ర రైతుల కోసం కాదని.. తెలంగాణ రాష్ట్రంలో కాంగ్రెస్ పార్టీని బలపరుచుకోవడం కోసమేనని ఆరోపణలు చేశారు. ఈ తరహాలోనే తాజాగా తెలంగాణ రోడ్డు, భవనాల శాఖమంత్రి తుమ్మల నాగేశ్వరరావు నిప్పులు చెరిగారు.

శుక్రవారం మధ్యాహ్నం మీడియాతో మాట్లాడిన తుమ్మల.. రాహుల్ యాత్రపై తీవ్రస్థాయిలో విరుచుకుపడ్డారు. అమాయకుడైన రాహుల్ గాంధీని తెలంగాణకు పిలిచి, అతనిని కాంగ్రెస్ నేతలు అవమానించారని ఆయన మండిపడ్డారు. పర్యటనకు ముందు రాహుల్ కు కనీస సమాచారం కూడా ఇవ్వలేదని, కాంగ్రెస్ హయాంలో ఆత్మహత్యలు చేసుకున్న రైతు కుటుంబాలకే ఆర్థిక సహాయం చేశారని, అంతకుమించి ఏమీ చేయలేదని ఆయన విమర్శించారు.

రాహుల్ చేసిన యాత్ర ‘రైతు భరోసా యాత్ర’లా కాకుండా.. కాంగ్రెస్ ‘మేలుకొలుపు’ యాత్ర జరిపించారని ఎద్దేవా చేశారు. మరో నాలుగేళ్ల తర్వాత రైతు ఆత్మహత్యలు జరిగితేనే టీఆర్ఎస్ ప్రభుత్వం బాధ్యత వహిస్తుందని ఆయన అన్నారు. మరి.. ఈయన చేసిన వ్యాఖ్యలపై కాంగ్రెస్ పార్టీ ఏ విధంగా స్పందిస్తుందో వేచి చూడాల్సిందే!