బాబు ఏం చెప్తారో.. ఏం చేస్తారో.. ఎవరికీ తెలియదు!

Posted: 05/14/2015 12:40 PM IST

టీడీపీ, వైఎస్సార్ కాంగ్రెస్ మధ్య వున్న విభేదాలు ప్రత్యేకంగా చెప్పుకోవాల్సిన అవసరం లేదు. పచ్చిగడ్డి వేస్తే భగ్గుమనేంత స్థాయిలో ఇరువురి పార్టీవర్గాలు ఆరోపణలు, విమర్శనాస్త్రాలను సంధించుకుంటుంటారు. ముఖ్యంగా వైఎస్సార్సీపీ వర్గాలైతే నిత్యం టీడీపీని టార్గెట్ చేస్తూ విమర్శలు చేయడమే పనిగా పెట్టుకున్నారు. పైగా.. అధికార పార్టీ ఇచ్చిన హామీలను నెరవేర్చడంలో జాప్యం చేస్తుండటంతో ఇదే అదునుగా భావించిన వైఎస్సార్సీపీ తన నోటివాటం ప్రదర్శిస్తోంది. ఈ క్రమంలోనే తాజాగా వైకాపా అధినేత జగన్ మోహన్ రెడ్డి సీఎం చంద్రబాబుపై తీవ్రస్థాయిలో ఆరోపణలు చేశారు.

ప్రస్తుతం అనంతపురం జిల్లాలో పర్యటిస్తున్న జగన్.. ఈ సందర్భంగానే బాబుపై విమర్శలు చేశారు. ‘చంద్రబాబు ఏం చేస్తారో? ఏం మాట్లాడతారో? ఎవరికీ తెలియదని ఆయన ఎద్దేవా చేశారు. ఎన్నికల నేపథ్యంలో ఆయన ఇచ్చిన హామీలు ఇంతవరకు నెరవేర్చలేదని అన్నారు. రైతుల కష్టాలు తీరుస్తానని మాటిచ్చిన ఆయన.. సీఎం పదవి చేపట్టగానే రైతుల గురించే మర్చిపోయారని తెలిపారు. ‘ఈ ఐదేళ్లు మనకు కష్టాలు తప్పవు. ఆ తర్వాత మన ప్రభుత్వం వస్తుంది. అందరి కష్టాలు తీరుతాయి’ అని భరోసానిచ్చారు. ఆత్మహత్యలకు పాల్పడరాదని ఆయన సూచించారు. ‘మీ అందరికీ అండగా నేనున్నాను. ధైర్యంగా వుండండి’ అని హితువు పలికారు. జగన్ యాత్ర సందర్భంగా ఆయన అభిమానులు, వైకాపా కార్యకర్తలు భారీ సంఖ్యలో తరలివచ్చారు.