బాబుకంటే పక్కవారే మేలు : రోజా

Posted: 03/17/2015 01:04 PM IST

వైకాపా ఎమ్మెల్యే, నటి రోజా మరోసారి ఏపీ సీఎం చంద్రబాబును టార్గెట్ చేస్తూ విమర్శలు గుప్పించారు. టీడీపీ ప్రభుత్వం కేవలం తప్పుడు హామీలతోనే సరిపెట్టుకుంటోందని ఆరోపణలు చేసిన ఆమె.. పక్క రాష్ట్రాలతో పోల్చుకుంటే ఏపీలో పరిస్థితి చాలా దారుణంగా వుందని ఆమె అన్నారు. అంగన్ వాడీ వర్కర్ల సమస్యలపై సభలో గందరగోళ చెలరేగడంతో.. స్పీకర్ కోడెల సభను కొద్దిసేపటి వరకు వాయిదా వేశారు. ఈ సమయంలోనే మీడియా పాయింట్ వద్ద మాట్లాడిన ఆమె.. ప్రభుత్వ వైఖరిని దుయ్యబట్టారు.

* పక్క రాష్ట్రాలతో పోల్చుకుంటే ఏపీలో అంగన్ వాడీలకు జీతం తక్కువగా వుందని విమర్శించారు.
* అంగన్ వాడీల బాధలను ఇతర రాష్ట్రాలవారు అర్థం చేసుకున్నారు కానీ మన ముఖ్యమంత్రికే ఇంకా అర్థం కావడం లేదని బాబుపై మండిపడ్డారు.
* తమ బాధలను సీఎంకు చెప్పుకుందామని వచ్చిన అంగన్ వాడీలను.. పోలీసులను లాక్కొని పోవడం చాలా దారుణమని ఆమె అన్నారు.
* అంగన్ వాడీలపై జరిగిన దారుణం బాబు నిరంకుశ పాలనకు అద్దం పడుతోందని ఆమె చెప్పారు.
* అంగన్ వాడీలకు న్యాయం జరిగేంతవరకు వాళ్ల తరఫున వైకాపా పోరాడుతూనే వుంటుందని ఆమె హామీ ఇచ్చారు.