రుణమాఫీలు రైతులను గట్టెక్కించవు:బాబు

Posted: 07/24/2014 04:45 PM IST

(Image source from: ap cm chandrababu naidu released white papers of farmer loans)

* ఆంధ్రప్రదేశ్ ముఖ్యమంత్రి నారా చంద్రబాబు నాయుడు వ్యవసాయ, అనుబంధ రంగాలపై శ్వేతపత్రం విడుదల చేసిన సందర్భంలో ఆయన రైతు రుణమాఫీల మీద కొన్ని వ్యాఖ్యలు గుప్పించారు.

* లేక్ వ్యూ అతిథిగృహంలో విలేకరుల సమావేశంలో మాట్లాడిన చంద్రబాబు.. రుణమాఫీ వల్ల మాత్రమే రైతుల సమస్యలు పరిష్కారం అవుతాయని అనుకోవడం చాలా తప్పని పేర్కొన్నారు.

* కాంగ్రెస్ అసమర్థ విధానాలను పాటించడం వల్లే నేడు రైతులు అప్పుల సుడిగుండంలో మునిగిపోయారని చెప్పిన ఆయన... కాంగ్రెస్ పాలనలో పెట్టుబడులు పెరిగి, దిగుబడులు పూర్తిగా తగ్గిపోయాయని అన్నారు.

* అప్పట్లో గిట్టుబాటు ధరలు లేకపోవడం వల్లే రైతులు తీవ్ర ఇబ్బందులను ఎదుర్కున్నారని, 2005 నుంచి 2013 వరకు అనుకూల పరిస్థితులు వున్నప్పటికీ కాంగ్రెస్ ప్రభుత్వం వ్యవసాయాన్ని సర్వనాశనం చేసిందని ఆయన ఆరోపణలు చేశారు.

* భూసార పరీక్షలు చేయడంలో నిర్లక్ష్యం చేయడమే కాకుండా.. మేఘమథనం పేరుతో కాంగ్రెస్ కాసుల వర్షం కురిపించుకుందని, సహజవనరులను విచ్చలవిడిగా దోచుకుని రైతులను అన్యాయం చేసిందని ఆయన తీవ్రంగా మండిపడ్డారు.

* రైతులు ఇబ్బందుల్లో వున్నందువల్లే రుణమాఫీ అమలు చేస్తున్నామని... వారికి వచ్చిన నష్టాలను తుడిచేస్తూ, కరువులను ఎదుర్కునే విధంగా ప్రభుత్వ కార్యక్రమాలను ఏర్పాటు చేస్తామని హామీ ఇచ్చారు.

* వ్యవసాయ సమస్యలను పరిష్కారంలో మొదటి చర్యగా రుణమాఫీని అమలు చేసి, వ్యవసాయ ఆదాయాన్ని పెంచుకునేవిధంగా అనుకూలమైన అన్నీ మార్గాలను అన్వేషిస్తామని ఆయన మాటిచ్చారు. అలాగే వ్యవసాయ అనుబంధ రంగాల ఆదాయాన్ని రెట్టింపు చేస్తామన్నారు.

* పంట రక్షణకు సాంకేతిక విధానాలను అమలు చేయడంతోపాటు ఆధునిక పద్ధతుల ద్వారా ఎక్కువ లాభాలు వచ్చేలా ప్రణాళికలను సిద్ధం చేస్తామన్నారు.

* కాంగ్రెస్ విధానాల వల్ల క్షీణించిన రైతుల జీవన ప్రమాణాలను తిరిగి పెంచేందుకు ప్రత్యేక చర్యలను అమలు చేస్తామని ఆయన స్పష్టం చేశారు.

* అప్పులు ఎక్కువగా వున్న రైతులు ఆత్మహత్య చేసుకోకుండా ధైర్యంగా వుండమని, ఆత్మహత్య చేసుకోవడం వల్ల అన్ని సమస్యలు పరిష్కారం కావని చెప్పిన ఆయన... రైతుల భారాన్ని ప్రభుత్వం తమ భుజస్కందాలపై వేసుకుని, వారికి కావాల్సిన అవసరాలను చేకూర్చడానికి ఎల్లప్పుడూ సిద్ధంగా వుంటుందని ఆయన హామీ ఇచ్చారు.