వాడుకుని వదిలివేయడం కేసీఆర్‌కు అలవాటే

Posted: 05/02/2013 07:49 PM IST

 

తెలంగాణ రాష్ట్ర సమితి అధ్యక్షుడు కె. చంద్రశేఖరరావు పెట్టిన ఆకర్ష పథకం ..వికటించింది. ఒకేసారి ముగ్గురు నాయకులు కేసిఆర్ కు షాకిచ్చారు. కేసిఆర్ పై మాజీ పార్లమెంట్ సభ్యుడు చాడ సురేష్‌రెడ్డి తీవ్ర స్థాయిలో ధ్వజమెత్తారు. కేసీఆర్‌కు ప్రత్యేక తెలంగాణ రాష్ట్రం రావడం ఎంతమాత్రం ఇష్టంలేదని, డబ్బులు దండుకోవడమే ఆయన పనని, డబ్బులు అవసరమైనప్పుడు ఉద్యమం, లేదంటే ఫామ్ హౌస్‌కు ఆయన పరిమితం అవుతారని చాడ ఆరోపించారు. టీఆర్ఎస్ నుంచి సస్పెన్షన్‌కు గురైన చాడ సురేష్‌రెడ్డి మాట్లాడుతూ తెలంగాణ పొలిటికల్ జేఏసీ ఆధ్వర్యంలో జరుగుతున్న తెలంగాణ ఉద్యమాన్ని కేసీఆర్ నీరుగార్చే ప్రయత్నాలు చేస్తున్నారని విమర్శించారు. కేసీఆర్ తప్పులను ఎత్తి చూపడం వల్లే తమను పార్టీ నుంచి సస్పెండ్ చేశారని ఆయన ఆగ్రహం వ్యకం చే శారు. వాడుకుని వదిలివేయడం కేసీఆర్‌కు అలవాటే అని ఆరోపించారు.

కేసీఆర్ నాయకత్వంలో 10 అసెంబ్లీ సీట్లు కూడా గెలవడం కష్టమే అని చాడ సురేష్‌రెడ్డి అభిప్రాయపడ్డారు. కేసీఆర్ ఫామ్ హౌస్‌లో కూర్చుని 15 సీట్ల కోసం కలలు కంటున్నారని ఆయన అన్నారు. టీఆర్ఎస్ నుంచి తనను ఎందుకు బహిష్కరించారో సమాధానం చెప్పాలని చాడ సురేష్‌రెడ్డి డిమాండ్ చేశారు. తెలంగాణ పొలిటికల్ జేఏసీ అధ్యక్షుడు ప్రొఫెసర్ కోదండరామ్ వంటి ఉద్యమకారుడు, నాయకుడు వల్లే ప్రత్యేక తెలంగాణ సాధ్యమని ఆయన పేర్కొన్నారు. కెసిఆర్ తెలంగాణ కోసం ఉద్యమించడం లేదన్నారు. కెసిఆర్, కోదండరామ్‌ల మధ్య గతంలో విభేదాలు పొడసూపిన విషయం తెలిసిందే. అయితే, చాడ సురేష్ రెడ్డి ఈ రోజు కెసిఆర్‌ను తూలనాడుతూ, కోదండ రామ్ వల్లే తెలంగాణ సాధ్యమని చెప్పడంపై రాజకీయ వర్గాల్లో చర్చ సాగుతోంది.