మధ్యవర్తిత్వం వహించలేమని ట్రంప్ క్లారిటీ: భారత రాయభారి

Posted: 08/13/2019 03:53 PM IST

జమ్ము-కశ్మీర్‌ లో అర్ఠికల్ 370తో పాటు ఆర్టికల్ 35-ఎ ను ఎత్తివేసి.. కేంద్రపాలిత ప్రాంతాలుగా మార్చుతూ.. భారత ప్రభుత్వం తీసుకున్న నిర్ణయం నేపథ్యంలో పాకిస్తాన్ కు ఇప్పటికే దూకుడు తగ్గించుకోవాలని హెచ్చరించిన అగ్రరాజ్యం అమెరికా ఇక తాజాగా మరో విషయాన్ని కూడా స్పష్టం చేసింది. కాశ్మీర్ వివాదాన్ని పరిష్కరించేందుకు అవసరమైతే మధ్యవర్తిత్వం వహించేందుకు తాను సిద్ధంగా ఉన్నానని కలకలం రేపిన అమెరికా అధ్యక్షుడు ట్రంప్ తాజాగా తన వ్యాఖ్యల పట్ల క్లారిటీ ఇచ్చారు.

కాశ్మీర్ విషయంలో మధ్యవర్తిత్వం వహించే ఎలాంటి ఆలోచన తమకు లేదని ట్రంప్ స్పష్టంగా చెప్పారని అమెరికాలో భారత రాయబారి హర్ష్ వర్దన్ శ్రింగ్లా తెలిపారు. ఇండియా-పాకిస్థాన్ లు చర్చల ద్వారానే కశ్మీర్ సమస్యను పరిష్కరించుకోవాలని దశాబ్దాల నాటి అమెరికా పాత పాలసీ చెబుతోందని... మధ్యవర్తిత్వం వహించాలనేది ఆ పాలసీలో లేదని అన్నారు. మధ్యవర్తిత్వానికి తాము ఒప్పుకోబోమని భారత్ స్పష్టం చేయడంతో... మధ్యవర్తిత్వం వహించే ఆలోచన తమకు లేదని ట్రంప్ స్పష్టం చేశారని తెలిపారు. లాహోర్ డిక్లరేషన్, సిమ్లా ఒప్పందం మేరకు ఇరు దేశాలు కశ్మీర్ సమస్యను పరిష్కరించుకోవాలని ట్రంప్ చెప్పారని అన్నారు.