అల్ ఖైదా చీఫ్ హమ్జా బిన్ లాడెన్‌ను హతమార్చిన అమెరికా

Posted: 08/01/2019 08:14 AM IST

ప్రపంచాన్ని వణికించిన అల్ ఖైదా ఉగ్రవాద సంస్థ చీఫ్ ఒసామా బిన్‌ లాడెన్ కుమారుడు.. ప్రస్తతం అదే ఉగ్రవాద సంస్థ అధ్యక్ష పగ్గాలు చేపట్టిన హామ్జా బిన్ లాడెన్ ను అగ్రరాజ్య అమెరికా తుదముట్టించిందా.? అంటే ఔనన్న సంకేతాలు కనిపిస్తున్నాయి. అయితే అగ్రరాజ్యం కానీ, లేక అదేశానికి చెందిన అధికారులు కానీ అధికారికంగా ఈ విషయాన్ని ప్రకటించలేదు. కాగా హామ్జా బిన్ లాడెన్ మరణానికి సంబంధించిన పక్కా సమాచారం తమ వద్ద వుందని ఎన్బీసీ వార్త సంస్థ ఈ వార్తను ప్రముఖంగా ప్రచురించింది.

హామ్జా బిన్ లాడెన్ అల్ ఖైదా ఛీప్ గా బాధ్యతలు చేపట్టిన తరువాత అతని కోసం రెండేళ్లుగా గాలిస్తున్న అమెరికా ఎట్టకేలకు విజయం సాధించింది. అతడిని హతమార్చినట్టు అమెరికా పత్రికలు ప్రకటించాయి. హమ్జా మృతిని అమెరికా అధికారులు కూడా ధ్రువీకరించినట్టు తెలిపింది. కాగా, గత ఏడాది తమ అధికారిక మీడియా అర్మ్ ద్వారా సౌదీ అరేబియాను హామ్జా బెదిరించాడు. అరేబియావాసులు స్థానిక ప్రభుత్వంపై తిరుగబాటు చేయాలని కూడా పిలుపునిచ్చాడు. ఇదే హమ్జా చివరి అధికారిక ప్రకటన.

2017లో హమ్జా బిన్ లాడెన్‌ ను ఉగ్రవాదుల జాబితాలో చేర్చిన అమెరికా అతడిపై మిలియన్ డాలర్ల రివార్డును కూడా ప్రకటించింది. కాగా, అమెరికా మీడియా మొత్తం హమ్జా మృతిపై కోడై కూస్తుండగా, అధ్యక్షుడు డొనాల్డ్ ట్రంప్ మాత్రం ఈ విషయంలో తాను ఎటువంటి వ్యాఖ్యలు చేయలేనని చెప్పడం గమనార్హం. ఇక అగ్రరాజ్యంలో ట్విన్ టవర్లను కూల్చిన తరువాత పాకిస్థాన్ లోని అబోట్టాబద్ లో తలదాచుకున్న ఒసామా బిన్ లాడెన్ ను 2011లో అగ్రరాజ్యం అమెరికాకు చెందిన నేవి పకడ్భందీ ప్రణాళికతో మట్టుబెట్టిన విషయం తెలిసిందే.