ITEMVIDEOS: బూత్ క్యాప్చరింగ్: కొడెల సహా 22 మందిపై కేసు

Posted: 04/16/2019 06:39 PM IST

బూత్ క్యాప్చరింగ్ చేశారన్న అభియోగాల నేపథ్యంలో ఆంధ్రప్రదేశ్ అసెంబ్లీ స్పీకర్, సత్తెనపల్లి టీడీపీ అభ్యర్థి కోడెల శివప్రసాద్‌పై కేసు నమోదైంది. రాజుపాలెం పోలీసు స్టేషన్ లో ఆయనకు వ్యతిరేకంగా వైసీపీ శ్రేణులు పిర్యాదు చేయడంతో కొడెల సహా 22 మంది అనుచరగణంపై పోలీసులు కేసు నమోదు చేశారు. ఏప్రిల్ 11న పోలింగ్ రోజున కోడెల.. పోలింగ్ బూత్ ఆక్రమణకు పాల్పడ్డారని ఆయనతో పాటు 22 మందిపై  ఐపీసీ సెక్షన్‌ 131, 132, 188, 143, 341, 448, 506, ఆర్‌/డబ్ల్యూ 149 తదితర ఎనిమిది సెక్షన్ల కింద కేసు నమోదయ్యాయి.

బూత్ క్యాప్చరింగ్ కేసులో కోడెలను 7వ నిందితునిగా చేర్చారు. సత్తెనపల్లి నియోజకవర్గంలోని ఇనిమెట్లలో పోలింగ్‌ బూత్‌ ఆక్రమణకు పాల్పడిన కోడెల శివప్రసాదరావు, అతని అనుచరులపై తక్షణమే కేసు నమోదు చేయాలని వైసీపీ నేతలు డిమాండ్ చేశారు. ఇనిమెట్లలో కోడెలపై దాడి అంటూ టీడీపీ నాయకులు తప్పుడు ఫిర్యాదు చేశారని వారు మండిపడ్డారు. ఏప్రిల్ 11న పోలింగ్ సందర్భంగా సత్తెనపల్లి నియోజకవర్గంలోని ఇనిమెట్లలో ఉద్రిక్త పరిస్థితులు నెలకొన్నాయి. తనపై వైసీపీ నేతలు దాడి చేశారని కోడెల ఆరోపించారు.

కోడెల బట్టలు చిరిగేలా వైసీపీ వాళ్లు దాడి చేశారని టీడీపీ నాయకులు మండిపడ్డారు. వైసీపీ వాదన మరోలా ఉంది. కోడెల పోలింగ్ బూత్ ను ఆక్రమించారని, పోలింగ్ బూత్ లోకి వెళ్లి చాలాసేపు తలుపులు మూసుకున్నారని, దీంతో ఆగ్రహం చెందిన స్థానికులు కోడెలపై తిరగబడ్డారని చెబుతున్నారు. కోడెలపై దాడి కేసులో వైసీపీ అభ్యర్థి అంబటి రాంబాబు సహా పలువురు నేతలపై పోలీసులు ఇప్పటికే కేసు నమోదు చేశారు. పలువురు అనుమానితులను అదుపులోకి తీసుకున్నారు.