గాలి జనార్థన్ రెడ్డి ఇంట్లో రహస్య లాకర్లు.. పీఏ కూడా పరారీలో..

Posted: 11/08/2018 01:08 PM IST

ఎన్ ఫోర్స్ మెంట్ డైరెక్టరేట్ కు చెందిన ఓ అధికారిని లొంగదీసుకుని ఏకంగా కోటి రూపాయలు లంచం ఇచ్చారన్న అభియోగాలపై మైనింగ్ కింగ్, బళ్లారి బీజేపీ నేత మాజీ మంత్రి గాలి జనార్ధన్ రెడ్డిపై కేంద్ర నేర విభాగానికి చెందిన ప్రత్యేక పోలీసు బలగాలు రంగంలోకి దిగాయి. అయితే తనను అరెస్టు చేసేందుకు సీసీబి బలగాలు వస్తున్నాయన్న సమాచారం అందుకున్న గాలి జనార్థన్ రెడ్డి అప్పటికే అజ్ఞాతంలోకి వెళ్లిపోయారు. దీంతో గాలి జనార్థన్ రెడ్డి కోసం అన్వేషణకు పోలీసులు రంగంలోకి దిగారు.

ప్రస్తుతానికి ఆయన జాడ తెలియనప్పటికీ, సాధ్యమైనంత త్వరలో గాలి జనార్థన్ రెడ్డిని అరెస్ట్ చేస్తామని పోలీసు ఉన్నతాధికారులు వెల్లడించారు. ఓ సంస్థను ఈడీ విచారణ నుంచి బయట పడేసేందుకు ఈడీ అధికారినే బుట్టలో వేసుకున్న గాలి జనార్ధన్ రెడ్డి, కోటి రూపాయలను లంచం ఇచ్చినట్టు వార్తలు వెలువడిన సంగతి తెలిసిందే. ఈ వ్యవహారంపై పక్కా సమాచారం అందుకున్న పోలీసులు, ఆయన నివాసాలు, కార్యాలయాలపై దాడులకు దిగారు.  దీంతో ఆయన కోసం ప్రత్యేక బృందాలు గాలింపు చేపట్టాయి.

ఇక ఈ కేసులో మరికొందరు పోలీసులు గాలి జనార్ధన్ రెడ్డిని ఇంటిని తనిఖీ చేయడంతో వారికి షాకింగ్ నిజాలు తెలిశాయి. దీంతో వారు దిగ్భ్రాంతి గురయ్యారు. గాలి జనార్థన్ రెడ్డి ఆచూకీ కోసం సీసీబీ పోలీసులు, ఇంట్లో తనిఖీలకు వెళ్లిన సమయంలో, ఇంటి గోడల మధ్య రహస్య లాకర్లు కనిపించాయని వెల్లడించారు. గోడల మధ్య ఉన్న లాకర్లలో ఏం దాచారన్న విషయాన్ని పరిశీలిస్తున్నామని తెలిపారు. ఇదే సమయంలో గాలి వ్యక్తిగత సహాయకుడిగా వున్న అలీఖాన్ అనే వ్యక్తి ఇంట్లో తనిఖీలు చేసిన పోలీసులకు పేలుడు పదార్థాలు లభించాయి. ఈ విషయాన్ని వెల్లడించిన పోలీసులు, గాలి ఆచూకీ కోసం తీవ్రంగా ప్రయత్నిస్తున్నామని చెబుతున్నారు.