జగన్ పై దాడి కేసులో నిందితుడి సోదరి అనుమానాలు.

Posted: 11/05/2018 01:11 PM IST

Ys jagan attack case srinivas rao sister suspects someone behind the screen

విశాఖపట్నం విమానాశ్రయంలో వైసీపీ అధినేత, ఏపీ ప్రతిపక్ష నాయకుడు వైఎస్ జగన్ పై దాడి చేసిన తన తమ్ముడు జనిపల్లి శ్రీనివాస రావుతో ఎవరో హత్యాయత్నం చేయించారని ఆయన సోదరి రత్నకుమారి అనుమానాన్ని వ్యక్తం చేశారు. తన తమ్ముడిని ఏ విధంగానో ప్రలోభాలకు గురిచేసి.. డబ్బులిస్తామని ఆశ పెట్టి వారు ఈ దారుణానికి పాల్పడేలా చేశారని సందేహాన్ని వ్యక్తం చేశారు. ఆ డబ్బుతో తన తమ్ముడు భూమిని కొనుగోలు చేయాలని భావించి వుండవచ్చని రత్నకుమారీ పేర్కోన్నారు.

అయితే తన తమ్ముడిని ఉసిగొల్పి.. ప్రలోభపెట్టి ఈ దారుణానికి పాల్పడేలా చేసినవారి పేరు చెబితే ఆయనకు హాని చేస్తామని కూడా వారు భయపెట్టి ఉండవచ్చని.. ప్రాణాలు తీస్తామని కూడా హెచ్చరించి వుండవచ్చని.. అందువల్లే అతను వారి పేరు చెప్పడం లేదన్న అనుమానాన్ని వ్యక్తం చేశారు. తన తమ్ముడు ఇప్పుడీ కేసులో బలపైపోయాడని, వాళ్లు ఎన్ని డబ్బులేసినా తన తమ్ముడికి ఎలాంటి ప్రయోజనం చేకూరకుండా పోతుందని అమె అందోళన వ్యక్తం చేసింది.

తమ తమ్ముడి చేతిలో రూపాయి కూడా లేదని, అతను ఇంత దారుణం చేస్తాడని తాము ఊహించలేదని రత్నకుమారి వ్యాఖ్యానించింది. ఈ పని చేయించిన వారు తమ తమ్ముడిని చంపేస్తారన్న భయం ఇంట్లోని అందరిలోనూ నెలకొని వుందని, ఎవరో చేయించిన పనికి తన తమ్ముడు బలయ్యాడని తెలిపింది. అసలు శ్రీనివాస్, 9 ఫోన్లను మార్చాడంటేనే నమ్మశక్యం కావడం లేదని, ఎప్పుడూ తన వద్దకు వచ్చి, పెట్రోలు కోసం రూ. 20 , రూ. 30 అడిగి తీసుకు వెళ్లేవాడని చెప్పింది. తాము మొత్తం ఆరుగురమని, ఆరుగురిలో ఒకడు పోయినట్టే అనిపిస్తోందని, ఇక వాడు తిరిగి వస్తాడో, రాడోనన్న ఆందోళనను వ్యక్తం చేసింది.