వాలెంటైన్స్ డే: ప్రేమికులకు వరాన్ని అందించిన వీహెచ్పీ

Posted: 02/12/2018 07:46 PM IST

గత కొన్నేళ్లుగా కొనసాగిస్తున్న చర్యల నుంచి ఎట్టకేలకు విశ్వ హిందూ పరిషత్ (వీహెచ్పీ) యూ టార్న్ తీసుకుంది. వాలెంటైన్స్ డే రోజున యువతీ-యువకులు ఎక్కడ ఏకాంతంగా కనిపించినా.. వారిని అడ్డుకుని పెళ్లిళ్లు చేసిన వీహెచ్పీ ఇకపై అలాంటి చర్యలకు పూనుకోవద్దని మరో రెండు రోజుల్లో రానున్న వాలెంటైన్స్ డే ముందు చెప్పింది. వీహెచ్పీ కార్యకర్తలు ప్రేమికుల రోజును నిర్వహించుకోవడాన్ని వ్యతిరేకిస్తూ.. అ రోజున ప్రేమికులు ఎక్కడ కనబడిని చర్యలు తీసుకుంటుంది. అయితే ఈ ఏడాది మాత్రం అందుకు విభిన్నంగా స్పందించింది.

మరో రెండు రోజుల్లో వేలంటైన్స్ డే ఉన్నందున వీహెచ్‌పీ అంతర్జాతీయ కార్యనిర్వాహక అధ్యక్షుడు ప్రవీణ్ తొగాడియా ఈ సందర్భంగా యువతకు ఇచ్చిన సందేశం ఒకింత ఆశ్చర్యాన్ని కల్గిస్తుంది. యువతీ యువకులకు ప్రేమించే హక్కు ఉందని ఆయన వాలెంటైన్స్ డే రోజు సందేశాన్ని ఇచ్చారు. ప్రేమికుల రోజున ఆందోళనలు లేదా హింస ఉండరాదని ఆయన కోరారు. చండీగఢ్ లో వీహెచ్పీ, భజరంగ్ దళ్ కార్యకర్తలను ఉద్దేశించి ప్రవీణ్ తొగాడియా తమ కార్యకర్తలకు పలు సలహాలు, సూచలను చేశారు.

 'జంటలు ప్రేమలో పడకుంటే, పెళ్లిళ్లు జరగవు. అలా పెళ్లిళ్లు లేకుంటే ప్రపంచం పురోగతి సాధించదు. అందువల్ల యువతీయువకులకు ప్రేమించే హక్కుంది. వారు ఈ హక్కును పొందాలి' అంటూ ఆయన సందేశమిచ్చారు. ప్రేమికుల రోజు నాడు తమ కార్యకర్తలు ఆందోళనలు, నిరసనలు చేపట్టకుండా వారికి తగిన ఆదేశాలు జారీ చేశామని ఆయన చెప్పారు. తమ కుమార్తెలు, సోదరీమణులకు కూడా ప్రేమించే హక్కుందంటూ సందేశపూర్వకంగా తెలిపామన్నారు. కాగా, వీహెచ్‌పీ, భజరంగ్ దళ్ కార్యకర్తలు కొన్నేళ్లుగా భారత్‌లో ప్రేమికుల రోజును నిషేధించాలని డిమాండ్ చేస్తున్న సంగతి తెలిసిందే.