4 వేల మందిని కాపాడిన బాంబ్ స్క్వాడ్

Posted: 02/02/2018 09:59 AM IST

హాంకాంగ్ పోలీసులు సుమారు నాలుగు వేల మంది ప్రాణాలు కాపాడారు. రెండో ప్రపంచ యుద్ధ సమయంలో పేలకుండా పోయిన ఓ బాంబును నిర్వీర్యం చేశారు. దీంతో హాంకాంగ్ ప్రభుత్వం ఊపిరి తీసుకుంది.

రెండో ప్రపంచ యుద్ధంలో హాంకాంగ్ లోని ఈ ప్రాంతం జపాన్ అధీనంలో ఉండేది. ఆ సమయంలోనే అమెరికా ఈ బాంబును జారవిడిచింది. అయితే అది పేలకుండా ఉండిపోయింది. దానిపై మట్టి పేరుకుపోయింది. చుట్టూ నివాస ప్రాంతాలు వెలిశాయి. మారిన కాలానికి అనుగుణంగా ఆ వీధిలో వాణిజ్య సముదాయాలు వెలిశాయి. నిత్యమూ బిజీగా మారిపోయింది. ఇప్పుడు ఆ ప్రాంతంలో నూతన నిర్మాణం చేపట్టాలని భావించి తవ్వకాలు సాగిస్తుండగా, ఆ భారీ బాంబు బయటపడింది. దీంతో ఈ అప్రమత్తమైన అధికారులు ప్రజలను సురక్షిత ప్రాంతాలకు తరలించారు. యాంటీ బాంబ్ స్క్వాడ్, పోలీసులు సుమారు 50 గంటలపాటు శ్రమించి జాగ్రత్తగా దాన్ని బయటకుతీసి నిర్వీర్యం చేశారు.

ఏఎన్-ఎం 65 బాంబు... ఇది అమెరికా తయారు చేసిన బాంబు. దాదాపు 1000 పౌండ్ల బరువుంది. ఇక ఇది పేలివుంటే ఈ ప్రాంతంలో దాదాపు 4 వేల మంది వరకూ మరణించి వుండేవారని అధికారులు తెలిపారు. గడచిన వారం రోజుల వ్యవధిలో హాంకాంగ్ లో బయటపడిన రెండో బాంబు ఇది.