సినీపక్కీలో బాయ్ ఫ్రెండ్ తో వధువు జంప్..!

Posted: 01/29/2018 01:02 PM IST

మరికొ్ద్ది క్షణాల్లో అక్కడ వున్న కోలాహాల వాతావరణం.. కన్నీళ్లు.. ఆనందబాష్పలకు నిలయంగా మారనున్న తరుణం. అమ్మాయిని కన్న తల్లిదండ్రుల ఆశలు, బాధ్యతలు తీరునున్న క్షణాలు అవిష్కృతం. కల్యాణమండపంలో బంధుమిత్రుల హడావుడి... కొత్త బంధుత్వాలు, అప్యాయతలకు పునాదులు పడుతున్న సమయంలో.. వరుడ్ని కూర్చోబెట్టి పెళ్లి తంతు కూడా మొదలు పెట్టేశారు.

వేదమంత్రోచ్చరణ మధ్య అమ్మాయిని తీసుకురండీ అంటూ అయ్యవారు చెప్పేశారు. దీంతో అమ్మాయి కోసం అమె తరపు వారు వెళ్లారు. ఎంతకీ రానీ వధువు గురించి వరుడి కూడా వేయికళ్లతో వేచిచూస్తున్నాడు. అంతలో నాటకీయ ఫక్కీలో వరుడితో తాళి కట్టించుకోవాల్సిన వధువు తన బాయ్ ఫ్రెండ్‌తో కలిసి పారిపోయిన ఘటన కర్ణాటక రాష్ట్రంలోని చన్నకల్ మాలూర్ పట్టణంలో వెలుగుచూసింది.

వివరాల్లోకి వెళ్తే.. బెంగళూరు నగరానికి 46 కిలోమీటర్ల దూరంలోని పద్మావతి కల్యాణ మండపంలో వరుడు గురేష్ (23) వధువు సౌమ్యకు పెళ్లి చేయాలని నిర్ణయించుకున్నారు. పెళ్లి సందడి ఆరంభమైంది. వరుడు గురేష్ ముస్తాబై వధువు రాక కోసం పెళ్లి మండపంలో ఎదురుచూస్తుండగా అంతలో వధువు తన బాయ్ ఫ్రెండ్ తో పారిపోయింది. అంతే వధూవరుల కుటుంబ సభ్యుల మధ్య వాగ్వాదం మొదలైంది. ఎట్టకేలకు వధువుకు చెల్లెలు అయిన బాబాయ్ కూతురైన వెంకటరత్నమ్మ అనే మరో అమ్మాయితో గుర్రేష్ కు వివాహం చేయాలని రెండు కుటుంబాల పెద్దలు నిర్ణయించుకున్నారు.

వీరి వివాహానికి సంప్రదాయ బద్ధంగా పూజాదికాలు నిర్వహించారు. విందు కూడా జరిగింది. అంతలో ఈ సారి వరుడు వధువుకు షాకిచ్చి పారిపోయాడు. మొదటి వధువు చేసిన పనికి ప్రతీకారంగా రెండోసారి పెళ్లి ఏర్పాట్లు చేసి ఆపై వధువుకు చేయిచ్చి వరుడు తన ప్రియురాలి కోసం పారిపోయాడు. మొత్తం మీద పెళ్లి కాస్తా జరగక పోవడంతో ఇరు కుటుంబాల పెద్దలు వెళ్లిపోవడంతో పెళ్లి వేడుక కాస్తా ఖాళీగా దర్శనమిచ్చింది. వధూవరులు పారిపోయిన ఘటనలు బెంగళూరులో చర్చనీయాంశంగా మారాయి. పెళ్లి చేసుకోవాల్సిన వధూవరులిద్దరూ పారిపోయి బంధుమిత్రులకు ట్విస్ట్ మీద ట్విస్ట్ ఇచ్చారు.