పల్లెకు నగరవాసి.. ముమ్మరమైన పోలీసు గస్తీ..

Posted: 01/13/2018 11:11 AM IST

Hyderabadis went to native police security beeed up

ఉదయాన్నే బోగి మంటలు, బందువులు, మిత్రులు, శ్రేయోభిలాషుల పలకరింపులు క్షేమసమాచారాలు ఆ తరువాత అభ్యంగన స్నానాలు.. ఇక ఊరూ వాడా అంత ఒక్క చోట చేరి సరదాగా అటలు అడుకునే సంప్రదాయకర పండుగ రోజును ఎవరు మాత్రం వదులుకుంటారు. ఇందుకోసం ఏకంగా ఖర్చుకోసం కూడా వేచిచూడకుండా ప్రయాణాలు సాగిస్తుంటారు. తమ వారిని ముందుగానే పంపించి.. తాము మాత్రం బోగి రోజుకు ముందు చేరుకునేలా ప్లాన్ చేసుకుంటారు. ఈ హడావిడి కనిపించేంది కేవలం సంక్రాంతి పండుగ రోజున మాత్రమే,

ఈ క్రమంలో హైదరాబాద్ నగరంలో ఉద్యోగాలు, వ్యాపార రిత్యా కూడా స్థిరపడినవారు పల్లెలకు జాంజామని పరుగులు తీయడం తెలిసిందే. దీంతో ఏడాది పోడవునా ట్రాఫిక్ సమస్యతో సతమతమయ్యే భాగ్యనగరపు రహదారులు.. ఈ పర్వదినపు సెలవుల నేపథ్యంలో కాసింత విశ్రాంతి తీసుకుంటాయి. ఇక ఊళ్లకు వెళ్లే వారితో గత వారం రోజులుగా కిక్కిరిసిపోతున్న బస్టాండ్లు, రైల్వే స్టేషన్లు శుక్రవారం జాతరను తలపించాయి. పండుగ సమయం దగ్గరపడడంతో ఇళ్లకు వెళ్లే వారి సంఖ్య ఒక్కసారిగా పెరిగింది.

దీంతో హైదరాబాద్ నుంచి వివిధ ప్రాంతాలకు నడుస్తున్న 3500 రెగ్యులర్ బస్సులకు అదనంగా మరో 3650 ప్రత్యేక బస్సులను నడిపేందుకు ఆర్టీసీ సిద్ధమైంది. కొందరు పండుగ రద్దీని తట్టుకోలేక సొంత వాహనాలను ఆశ్రయించారు. గత నాలుగు రోజుల నుంచి ఇప్పటి వరకు 15 లక్షలమందికి పైగా పల్లె బాట పట్టారు. మరో ఐదు లక్షలమంది సొంతూళ్లకు వెళ్లే అవకాశం ఉంది. ఇప్పటికే రైళ్లు, బస్సులలో సీట్లు లభించని వాళ్లు సొంత వాహనాలలో కూడా సొంతూళ్లకు పరుగులు పెడుతున్నారు.

ఇక మరోవైపు సెలవుల నేపథ్యంలో ఇళ్లకు తాళాలు వేసి నగరవాసులు సొంతూళ్లకు వెళ్లిన క్రమంలో ఈ సమాచారం తెలుసుకున్న దొంగలు దోపిడీలకు, దొంగతనాలకు పాల్పడే అవకాశముంది. ఈ క్రమంలో పోలీసులు ముమ్మరంగా పెట్రోలింగ్ నిర్వహించనున్నారు. ఇప్పటికే బలియన్ దొంగల గ్యాంగ్ ఓ వైపు చెడ్డీ దోంగల గ్యాంగ్ మరోవైపు దొంగతనాలకు పాల్పడుతూ నగరవాసులలో భయాందోళన కలగజేస్తున్న క్రమంలో పోలీసులు ముమ్మరంగా నైట్ పెట్రోలింగ్ నిర్వహిస్తున్నారు.