పడవ మునక మరణాల బాధ్యత ప్రభుత్వానిదే..

Posted: 11/14/2017 01:34 PM IST

కృష్ణానదిలో పడవ బొల్తా కొట్టిన ఘటనలో 22 మందిని మరణించడంపై కాపు ఐక్యవేదిక ఉద్యమ నేత ముద్రగడ పద్మనాభం తీవ్రస్థాయిలో మండిపడ్డారు. ఈ మరణాలన్నింటికీ ప్రభుత్వమే బాధ్యత తీసుకోవాలని ఆయన డిమాండ్ చేశారు. ప్రభుత్వం, ప్రభుత్వ అధికారుల నిర్లక్ష్యంతో మాత్రమే ఈ మరణాలు సంభవించాయని ఆయన దుయ్యబట్టారు. ఈ మరణాలన్ని ప్రభుత్వ హత్యలుగా పరిగణించాలని అయన తీవ్రస్థాయిలో ధ్వజమెత్తారు.

రాష్ట్ర ప్రజలను ప్రభుత్వమే కృష్ణా, గొదావరిలో ముందచుతుందని విమర్శించిన ముద్రగడ.. ఈ మేరకు మరోమారు రాష్ట్ర ముఖ్యమంత్రి చంద్రబాబు నాయుడుకు లేఖాస్త్రాన్ని సంధించారు. ఈ సందర్భంగా గతంలో గోదావరి పుష్కరాల నేపథ్యంలో సీఎం చంద్రబాబు వీఐపీ ఘాట్ వద్ద కాకుండా.. సాదారణ ప్రజలు వచ్చే ఘాట్ వద్ద పూజలు నిర్వహించి పుణ్యనదిలో స్నానం అచరించేందుకు వచ్చిన 30 మంది భక్తులు తొక్కిసలాటలో బలితీసుకున్నారంటూ ఆ ఘటనను ఊటంకించారు.

తాజాగా ఇప్పుడు కృష్ణానదిలో పడవ బోల్తా ఘటనలో మరో 22మందిని కూడా ప్రభుత్వమే బలి తీసుకుందని ముద్రగడ అరోపించారు. ఈ ఘటనలపై ప్రభుత్వమే బాధ్యత వహించాలని డిమాండ్ చేశారు. తన పాదయాత్రను అడ్డుకునేందుకు కాపలా పెట్టిన పోలీసులను.. కృష్ణా నది వద్ద పహారాగా ఏర్పాటు చేసివుంటే అమాయక ప్రాణాలను కాపాడే అవకాశం వుండేదని అయన తన లేఖలో పేర్కొన్నారు.