ఇండిగో మరో తప్పిదం.. పెద్దావిడను కిందపడేసిన వైనం..

Posted: 11/13/2017 01:32 PM IST

వరుస తలనొప్పుల నుంచి చౌకధర విమానయానంగా పేరొందిన విమానయాన సంస్థ ఇండిగో ఇప్పట్లో బయటపడే అవకాశాలు మాత్రం కనిపించడం లేదు. వారం రోజుల వ్యవధిలో ఇండిగో సిబ్బంది మరో ప్రయాణికురాలిని కిందపడేసిన ఘటన నమోదు కావడమే ఇందుకు కారణం. ఇటీవల చెన్నైకి చెందిన ఓ మధ్యవయస్కుడైన వ్యక్తిపై ఇండిగో సిబ్బంది విమానాశ్రయంలో కిందపడేసి అతిదారుణంగా పిడిగుద్దులు బాది.. అతడ్ని బస్సు ఎక్కనీయకుండా అడ్డుకున్న ఘటనను మార్చిపోకముందే మరో ఘటన చోటుచేసుకుంది.

తాజాగా మరో పెద్దావిడను వీల్ చైర్లో నుంచి కిందపడి గాయపడడంతో ఈ వివాదానికి కూడా సంస్థ మెడకు చుట్టుకుంది. లక్నో విమానాశ్రయంలో ఇండిగో సిబ్బంది ఊర్వశి పారిఖ్ విరేన్ అనే ప్రయాణికురాలిని వీల్ చైర్లో తీసుకెళుతుండగా ఆమె కిందపడిపోయారు. దీనిపై స్పందించిన సదరు విమాన సంస్థ పెద్దావిడకు బేషరుతుగా క్షమాపణలు చెప్పింది. ఈ మేరకు ఓ ప్రకటన విడుదల చేసిన సంస్థ ప్రయాణికురాలికి క్షమాపణలు తెలిపింది.
 
ఇక సంస్థ మాటల్లో ప్రకటన సారాంశం ఇలా ‘‘ఊర్వశి పారిఖ్ విరేన్ అనే ప్రయాణికురాలికి క్షమాపణలు తెలుపుకుంటున్నాం. మా ప్రతినిధి అమెను వీల్ చైర్ లో వెహికిల్ లేన్ మీదుగా అరైవల్ హాల్ వైపు తీసుకుని వస్తుండగా, రాత్రి సమయంలో సరైన వెలుతురు లేని కారణంగా, రోడ్డుమార్గంలోని గుంతలో వీల్ చైర్ పడి.. అమె బ్యాలెన్స్ తప్పింది. దీంతో విరేన్ కిందపడి గాయపడ్డగా, వెంటనే ఆమెను ఎయిర్‌పోర్ట్ అథారిటీ ఆఫ్ ఇండియా వైద్యుడి వద్దకు తీసుకెళ్లి ప్రథమ చికిత్స అందించాం. అమె కోలుకున్నాక.. తనకు గాయం కావడం మానవతప్పిదం కాదని కూడా వ్యాఖ్యానించారు.