ట్రాఫిక్ సమస్యలకు మరికొద్ది రోజుల్లో చెక్..

Posted: 10/16/2017 10:47 AM IST

Check for traffic problems soon says goutham sawang

ట్రాఫిక్ ఇబ్బందులు తీరాలంటే నగర ప్రజలు మరో 75 రోజుల పాటు నిరీక్షించక తప్పదని విజయవాడ నగర పోలీస్ కమీషనర్ గౌతమ్ సవాంగ్ అన్నారు. బెజవాడ ఇంధ్రకీలాంద్రీ కనకదుర్గమ్మ ఆలయం వద్ద ఫ్లై ఓవర్‌ నిర్మాణ పనుల సందర్భంగా తాత్కాలికంగా ఏర్పడిన టాప్రిక్ ఇబ్బందులను ప్రజలు సంయమనంతో ఎదుర్కోవాలని సూచించారు. మరో 75 రోజుల్లో ప్రజల ట్రాఫిక్ ఇబ్బందులకు చెక్ పడుతుందని.. అప్పటి వరకు వాహనదారులు ఓపిక పట్టాలని గౌతమ్‌ సవాంగ్‌ అన్నారు.

ఇంద్రకీలాద్రి కనకదుర్గ ఆలయం వద్ద నిర్మితమవుతున్న ఫ్లై ఓవర్‌ నిర్మాణ పనులను, ట్రాఫిక్‌ మళ్లింపులను ఆయన పరిశీలించారు. విద్యాధరపురం కుమ్మరిపాలెం సెంటర్ నుంచి ఫ్రధాన వాటర్‌ వర్క్స్ వరకు కాలినడకన సందర్శించారు. ఆయనతో పాటు సోమా కంపెనీ ప్రతినిధులు, రోడ్డు భవనాల శాఖ అధికారులు కూడా పర్యటించి.. ఫైఓవర్ నిర్మాణంలో ఇబ్బందులను కమీషనర్ దృష్టికి తీసుకువచ్చారు. ఈ సందర్భంగా ఆయన మాట్లాడుతూ.. ట్రాఫిక్ సమస్యతో ప్రజలు అసౌకర్యానికి గురవుతున్నప్పటికీ ఫ్లై ఓవర్ నిర్మాణం దృష్ట్యా ఓపికపట్టి సహకరించాలని కోరారు.

వాహనదారులు ఇబ్బందులు పడకుండా పనులు జరుగుతున్న ప్రదేశాలను మినహాయించి, మిగిలినచోట్ల రాకపోకలు జరిగేలా చర్యలు తీసుకుంటామని చెప్పారు. అయితే ట్రాఫిక్ అధికంగా వున్న నేపథ్యంలో ఎవరికీ ఇబ్బంది కలగకుండా ఫ్లై ఓవర్ నిర్మాణ పనులు మెల్లిగా జరుగుతున్నాయని ఎమ్మెల్సీ బుద్ధా వెంకన్న అన్నారు. దేశంలోనే ఎక్కడా లేని విధంగా చేపట్టిన ఈ ఫ్లై ఓవర్ నిర్మాణంలో సాంకేతిక ఇబ్బందుల కారణంగా కూడా పనులు ఆలస్యం అవుతోందని చెప్పారు.