వెంకయ్యనాయుడిపై అసక్తికర వ్యాఖ్యలు చేసిన సుష్మాస్వరాజ్

Posted: 05/18/2017 02:42 PM IST

జాతీయ స్థాయిలో తెలుగువాడి సత్తాను చూపిన అనేక మందిలో రాజకీయ వేత్తలు కూడా పలువురు వున్నారు. కాగా, వారిలో బీజేపి సీనియర్ నేత, కేంద్ర మంత్రి వెంకయ్యనాయుడు కూడా ఒకరు కావడం గమనార్హం. అయితే ఇన్నాళ్లు జాతీయ స్థాయిలో తన సత్తాను చాటుకున్న ఆయన.. ఇక అంతర్జాతీయ స్థాయిలో తన మార్కును కనబర్చనున్నారు. ఐక్యరాజ్యసమితి 'ఆవాస' ప్రాజెక్టు అధ్యక్షుడిగా ఇటీవల ఎన్నికైన వెంకయ్యకు కేంద్ర కేబినెట్ అభినందనలు తెలిపింది.

వెంకయ్యనాయుడుని తన సోదరుడిగా భావించే మరో కేంద్రమంత్రి సుష్మా స్వరాజ్.. ఈ సందర్భంగా మాట్లాడుతూ ఆసక్తికర విషయాన్ని వెల్లడించారు. ఆవాస అధ్యక్షుడిగా వెంకయ్య నాయుడి ఎంపిక నాటకీయ పరిణామాల మధ్య జరిగిందని చెప్పారు. భారత్ కు వ్యతిరేకంగా ఓటు వేయాలని ఇజ్రాయెల్, పాలస్తీనాలు నిర్ణయించుకున్నాయని... అయితే, ఆ రెండు దేశాల ప్రతినిధులతో వెంకయ్య చర్చలు జరిపి, భారత్ కు అనుకూలంగా ఓటు వేసే విధంగా ఒప్పించారని తెలిపారు. ఈ సందర్భంగా మోదీ సహా సహచర మంత్రులంతా వెంకయ్యకు శుభాకాంక్షలు తెలిపారు. అంతర్జాతీయంగా మరిన్ని ఉన్నతమైన పదవులను చేపట్టాలని సుష్మా సహా కేంద్ర క్యాబినెట్ మంత్రులు ఆకాంక్షించారు.