జైలుకే పోతావ్.. ఎందుకు బ్రదర్!

Posted: 05/18/2017 10:24 AM IST

బీహార్ మాజీ ముఖ్యమంత్రి, ఆర్జేడీ అధినేత లాలూ ప్రసాద్ యాదవ్ టైం అస్సలు బాగోలేదు. మొన్నామధ్యే సుప్రీం కోర్టు అవినీతికి సంబంధించిన అన్ని కేసుల్లో ఆయనపై విచారణకు ఆదేశిస్తే.. నిన్నటికి నిన్న ఐటీ
శాఖ అక్రమాస్థులపై దాడులు చేసిన విషయం తెలిసిందే. దేశ రాజధాని ఢిల్లీ సరిహద్దు ప్రాంతంలో వేల కోట్లు విలువ చేసే భూములను ఆక్రమించేసుకున్నాడన్న ఆరోపణలు ఆయనపై వినిపిస్తున్నాయి. కేవలం మోదీని, ఆయన నేతృత్వంలోని బీజేపీ ప్రభుత్వాన్ని విమర్శించినందుకే తనపై ఇలాంటి కక్ష్య సాధింపు చర్యలకు పాల్పడుతున్నారన్నది లాలూ వర్షన్.

అయితే యూపీలో బీజేపీ గ్రాండ్ విక్టరీ తర్వాత ఎలాగైనా వారిలో ప్రజా వ్యతిరేకత ఉందని నిరూపించేందుకు లాలూ సిద్దమైపోతున్నాడు. ఆగష్టులో పాట్నా వేదికగా బీజేపీ వ్యతిరేక పార్టీలన్నింటిని సమీకరించి ఓ భారీ ర్యాలీ చేయాలని భావించాడు. సుమారు 5 లక్షల మంది దీనికి హాజరవుతారని అంచనా వేస్తుండగా, సోనియా గాంధీ, మమతా బెనర్జీ, మాయవతి ముఖ్య అతిథులుగా దాదాపు ఖరారు అయిపోయారు. వామపక్షాల నేతలు కూడా తమ సమ్మతిని త్వరలోనే తెలియజేస్తామనే గ్రీన్ సిగ్నల్ ఇచ్చారు. అయితే దీనికి కౌంటర్ ఇచ్చేసింది బీజేపీ పార్టీ.

ఆ రాస్ట్ర బీజేపీ చీఫ్ సుశీల్ కుమార్ మోదీ ఈ యత్నాన్ని ఓ హడావుడి చర్యగా పేర్కొన్నాడు. ఆగష్టులోపు లాలూ జైల్లో ఉంటాడని, అలాంటప్పుడు ర్యాలీ చేయటం అవసరమా? అంటూ ఓ మీటింగ్ లో ప్రసగించాడు. ఇక బీహార్ ఎన్నికలకు ఇప్పటి నుంచే గ్రౌండ్ వర్క్ ప్రారంభించేసిన లాలూ అవసరమైతే మోదీపై ప్రశంసలు కురిపిస్తున్న జేడీ(యూ) ను పక్కన పెట్టైనా మిగతా వాళ్ల సాయంతో మహా కూటమి ఏర్పాటు చేసి దూసుకెళ్లాలని భావిస్తున్నాడు.