ప్రతీకారం తీర్చుకున్న పోలీసులు.. బీజాపూర్ ఎన్ కౌంటర్ లో 20 మంది నక్సల్స్ హతం

Posted: 05/16/2017 08:25 PM IST

ఛ‌త్తీస్ గ‌ఢ్‌లోని బీజాపూర్ లో భారీ ఎన్ కౌంటర్ జరిగింది. ఇటీవల మావోయిస్టులు 25 మంది పోలీసులను హతమార్చిన నేపథ్యంలో ప్రతీకారం తీర్చుకునేందుకు రంగంలోకి దిగిన పోలీసు బలగాలు అడవిని జల్లెడ పడుతున్నాయి. ఈ క్రమంలో 350 మంది పోలీసులు కూంబింగ్ నిర్వహిస్తున్నారు. అడవుల్లో కూంబింగ్‌ చేపట్టిన పోలీసులకు మావోలు తారసపడ్డారు. దీంతో ఇరు వర్గాల మధ్య ఎదురుకాల్పులు జరిగాయి. ఈ కాల్పుల్లో 15 నుంచి 20 మంది మావోయిస్టులు ప్రాణాలు కోల్పోయినట్లు అధికారులు వెల్లడించారు.

మ‌రోవైపు సుక్మా జిల్లాల్లోని తాల్చేరు ప్రాజెక్టు ప్రాంతంలోని చింతల్నార్‌, చింత‌గుఫా ప్రాంతాల్లో అనుమానాస్పదంగా సంచరిస్తున్న 8 మంది మావోయిస్టుల‌ను సీఆర్పీఎఫ్ జ‌వాన్లు అరెస్టు చేశారు. వారి నుంచి రూ.20 లక్షల నగదును పోలీసులు స్వాధీనం చేసుకున్నారు. వీరిని మావోయిస్టులకు వినియోగించుకునే కోరియర్లుగా (సాయం చేసేవారిగా) అనుమానిస్తున్నారు. అయితే, ఎన్‌కౌంటర్‌ కచ్చితంగా ఏ ప్రాంతంలో జరిగిందనే విషయంపై స్పష్టత లేదు. ఎన్‌కౌంటర్‌లో సీఆర్‌పీఎఫ్‌ బలగాలు, రాష్ట్ర పోలీసులు పాల్గొన్నట్లు తెలిసింది. కాగా, ఎదురు కాల్పుల ఘ‌ట‌న‌పై మ‌రింత స‌మాచారం అందాల్సి ఉంది.