చిరు బ్లడ్ బ్యాంకుతో చేతులు కలిపింది ఎవరంటే...

Posted: 01/17/2017 11:46 AM IST

మెగాస్టార్ చిరంజీవి ఆధ్వర్యంలో నడిచే బ్లడ్ బ్యాంకు కోసం రక్త సేకరణ కార్యక్రమం భారీ ఎత్తులో జరగనుంది. అయితే అది ఒక్క ఈ బ్లడ్ బ్యాంకుకే పరిమితం కాదు. ఇంతకీ ఇది నిర్వహిస్తోంది ఎవరో తెలుసా?. తెలుగుదేశం పార్టీ. రెండు తెలుగు రాష్ట్రాల్లో ‘లెజెండరీ బ్లడ్‌ డొనేషన్‌ డ్రైవ్‌’ పేరుతో బుధవారం భారీ రక్తదాన కార్యక్రమం నిర్వహించబోతున్నారు. ఈ విషయాన్ని ఏపీ సీఎం చంద్రబాబు నాయుడు సతీమణి, ఎన్టీఆర్‌ ట్రస్టు బోర్డు సభ్యురాలు నారా భువనేశ్వరి తెలిపారు.

జనవరి 18న తెలుగుదేశం పార్టీ వ్యవస్ధాపకుడు, మాజీ సీఎం ఎన్టీఆర్‌ వర్ధంతిని పురస్కరించుకుని ఈ కార్యక్రమం చేపట్టనున్నారంట. తెలుగువారి హృదయాల్లో చిరస్ధాయిగా నిలిచిపోయిన ఎన్టీఆర్‌ మహోన్నత వ్యక్తిత్వాన్ని, సేవాస్ఫూర్తిని ఆదర్శంగా తీసుకుని రక్తదానం నిర్వహిస్తున్నామని ఆమె చెప్పారు. గత ఏడాది రెండు తెలుగు రాష్ట్రాల్లో 145 చోట్ల ఇదే సందర్భంలో రక్తదాన శిబిరాలు విజయవంతంగా నిర్వహించామని, ఆ స్పూర్తితో ఈసారి మరిన్ని చోట్ల నిర్వహించాలని ప్రయత్నిస్తున్నామని వెల్లడించారు.

ఇక ట్రస్టు సీఈవో టి.విష్ణువర్ధన్‌ మాట్లాడుతూ.. ఈ భారీ కార్యక్రమంలో ఎన్టీఆర్‌ ట్రస్టు రక్తనిధితోపాటు చిరంజీవి రక్తనిధి, రెడ్‌క్రాస్‌, రోటరీ క్లబ్‌, లయన్స్‌ క్లబ్‌, ప్రభుత్వ బ్లడ్‌ బ్యాంకులు, ఆరోహి, ఇతర రక్తనిధి సంస్ధలు పాల్గొంటున్నాయన్నారు. తెలంగాణలో ఈ కార్యక్రమాన్ని బుధవారం ఉదయం ఇక్కడి ఎన్టీఆర్‌ ట్రస్ట్‌ భవన్‌లో భువనేశ్వరి, బ్రహ్మణి ప్రారంభిస్తారు. ఆంధ్రప్రదేశ్‌లో విజయవాడ సిద్ధార్థ మేనేజ్‌మెంట్‌ కళాశాలలో ఏర్పాటు చేసిన ఎన్టీఆర్‌ మ్యూజియం వద్ద టీడీపీ జాతీయ ప్రధాన కార్యదర్శి లోకేశ్‌ రక్తదాన శిబిరాన్ని ప్రారంభిస్తారు.