ఖైదీ ఫస్ట్ టాక్ ఏమంటున్నారు?

Posted: 01/11/2017 07:50 AM IST

మెగా అభిమానులు ఎదురు చూస్తున్న రోజు రానే వచ్చింది. ఈ తెల్ల‌వారుజామున 4 గంట‌ల‌కు బెనిఫిట్ షోల‌తో ప్రేక్ష‌కుల ముందుకు వ‌చ్చిన మెగాస్టార్ చిరంజీవి తాజా చిత్రం ఖైదీ నంబ‌ర్ 150 ఫ‌స్ట్ టాక్ వ‌చ్చేసింది. సినిమా చూసొచ్చిన వారు సంతృప్తి వ్యక్తం చేస్తున్నారు. అభిమానులు అయితే ఆనందంతో ప‌ర‌వ‌శించిపోతున్నారు. సినిమా సూప‌ర్ డూప‌ర్ హిట్ అని చెబుతున్నారు. ఓవరాల్ గా చెబుతున్నది ఏంటంటే... సినిమాలో ఎంతో యాక్టివ్‌గా న‌టించాడ‌ని, అత‌డి న‌ట‌న‌లో జోష్ ఏమాత్రం త‌గ్గ‌లేద‌ని చెబుతున్నారు. డ్యాన్సుల్లో మునుప‌టి జోరు చూపించాడ‌ని అంటున్నారు.

ఖైదీ నంబ‌ర్ 150 సినిమా చిరంజీవి గ‌త సినిమాల‌ను గుర్తు చేసింద‌ని పేర్కొన్నారు. జ‌గ‌దేక‌వీరుడు అతిలోక సుంద‌రి సినిమాలో ఎంత అందంగా ఉన్నాడో ఈ సినిమాలోనూ చిరు అంతే అందంగా ఉన్నాడ‌న్నారు. రైతుల క‌ష్టాలే ఇతివృత్తంగా ఈ సినిమా ఉంద‌ని, న‌ట‌న సూప‌ర్ అని అభిమానులు ఎగిరి గంతేస్తున్నారు. త‌మిళ సినిమాకు రీమేక్ అయినా తెలుగు నేటివిటీకి ద‌గ్గ‌రగానే ఉంద‌ని చెప్పారు.

అయితే వినాయక్ తన మార్క్ లేకుండా సినిమాను యాజ్ ఇట్ ఈజ్ గా దించేశాడని చెబుతున్నారు, బలవంతంగా ఇరికించిన కామెడీ సీన్లే డ్రా బ్యాక్ గా ఉన్నాయని కొందరు చెబుతున్నారు. పైగా ఒరిజినల్ తో పొలిస్తే ఫీల్ మిస్సయిందని మరి కొందరు అంటున్నారు. ఓవరాల్ గా చిరు గ్రాండ్ రీఎంట్రీ సగటు సంతృప్తికరంగానే ఉందని ప్రేక్షకుడి ఒపినీయన్. చూద్దాం కాసేపట్లోనే పూర్తి రివ్యూ వచ్చేస్తుంది.