అగ్ని ప్రమాదం.. అస్ట్రేలియా టీమ్ సురక్షితం..

Posted: 07/30/2016 09:31 AM IST

రియో ఒలంపిక్స్ కు అతిథ్యమిస్తున్న బ్రెజిల్ లో అపశృతులు చోటుచుసుకుంటున్నాయి. ఇప్పటికే నెల రోజుల క్రితం ఓ యువతిపై స్థానిక యువత జరిపిన గ్యాంగ్ రేప్ కేసు కలకలం సృష్టించగా, మరో వైపు ఉగ్రదాడులు జరుగుతున్నాయని వార్తలు వెలుగుచూసాయి. ఈ నేపథ్యంలో రియో ఒలంపిక్స్ కోసం అక్కడికి చేరుకున్న క్రీడాకారులు తాత్కాలిక నివాసం కోసం అక్కడి ఒలంపిక్స్ విలేజ్ లో బస ఏర్పాటు చేశారు. అయితే ఈ విలేజ్ లో అనుకోకుండా అగ్నిప్రమాదం సంభవించడంతో క్రీడాకారులు అందోళనకు గురయ్యారు. ఈ ప్రమాదం నుంచి ఆస్ట్రేలియా అథ్లెట్ల బృందం సురక్షితంగా బయటపడింది. అయితే ఈ ప్రమాదంలో క్రీడాకారులు ఎలాంటి గాయాలు కానీ, వారి కోసం ఏర్పాటు చేసిన రియో ఒలంపిక్ విలేజ్లో ఎలాంటి నష్టం లేకపోవడంతో అధికారులు ఊపిరి పీల్చుకున్నారు.

ఒలంపిక్ విలేజ్ లోని అస్ట్రేలియా అథ్లెట్లు ఉన్న అపార్ట్మెంట్లో అగ్నిప్రమాదం చోటు చేసుకుంది. ఒక్కసారిగా అపార్ట్మెంట్లో పొగలు వ్యాపించడంతో.. అథ్లెట్లను అధికారులు అక్కడి నుంచి ఖాళీ చేయించారని ఆస్ట్రేలియా జట్టు స్పోక్స్ పర్సన్ మైక్ టాంక్రెడ్ వెల్లడించారు. ఫైర్ అలారం మోగటంతో ఆటగాళ్లను అపార్ట్మెంట్ నుంచి బయటకు పంపినట్లు జిన్హువా మీడియా సంస్థ తెలిపింది. అగ్నిమాపక సిబ్బంది అక్కడికి చేరుకుని పరిస్థితిని అదుపులోకి తెచ్చారు. అనంతరం ఆటగాళ్లు తిరిగి అపార్ట్మెంట్లోకి వెళ్లారు. బిల్డింగ్ బేస్మేట్ ప్రాంతంలో మంటలను గుర్తించినట్లు అధికారులు వెల్లడించారు.