చెల్లి వైద్యం కోసం ఓ అక్క ఏం చేసిందంటే...

Posted: 05/27/2016 10:23 AM IST

Chinese woman risk her life for sister leukemia treatment

పైసా ప్రపంచంలో బంధాలు, బంధుత్వాలు కానరాకుండా పోతున్నాయి. రక్తసంబంధీకులే డబ్బు కోసం పైశాచికంగా హత్యలు చేయటం, ఘోరాలకు పాల్పడటం నిత్యం మనం చూస్తున్నాం. కానీ, ఇక్కడో అక్క ఉదంతం ఇంకా ప్రేమలు, విలువలు ఉన్నాయని నిరూపిస్తోంది. తన చెల్లి కోసం ఈ భూమ్మీద ఎవరూ చేయని సాహసానికి సిద్ధపడిపోయింది.

చైనాలో హాంగ్ జౌ ప్రావిన్స్ లోని వులియన్ స్క్వేర్ లోని ఓ బిజీ రోడ్డు. ఎవరి పనుల్లో వారు మునిగిపోయి ఉండగా, హఠాత్తుగా ఒక యువతి ఓ కార్డ్ బోర్టు పట్టుకుని ప్రత్యక్షమైంది. దారిన పోయే వారందరూ ఆ బోర్డును చూసి ఆశ్చర్యానికి గురయ్యారు. దాని మీద నా మీదకు బాణాలు సంధించండి. ఒక్కో బాణానికి పది యువాన్ చెల్లించండి అని రాసుంది. ఇంతలో ఓ వ్యక్తి సమీపంలోని పోలీస్ స్టేషన్ కు ఫోన్ చేసి ఈ సమాచారాన్ని అందించాడు. పోలీసులు అక్కడికి చేరుకుని యువతిని అదుపులోకి తీసుకుని ప్రశ్నించారు. ఆమె చెప్పిన సమాధానం విని పోలీసులు కంటతడి పెట్టసాగారు.

ఆ యువతి పేరు జి జియాలీ. తండ్రి ఇటీవలె మరణించాడు. తన చెల్లి ప్రాణాంతకమైన లుకేమియాతో బాధపడుతోంది. అప్పులో ఉన్న తమ కుటుంబం ఇప్పుడు తన చెల్లికి వైద్యం అందించే స్థితిలో లేదు. వైద్య ఖర్చుల కోసం 3,50,000 యువాన్ లు(51లక్షలు) ఖర్చవుతాయని వైద్యులు చెప్పారు. అందుకే ఈ సాహసానికి ఒడిగట్టిందట. గతంలో మీడియా ముందుకు వచ్చి విజ్నప్తి చేసినా ఎవరూ సాయం చేయలేదని, ఇలా చేస్తేనైనా ఎవరైనా పట్టించుకుంటారేమోనని చెబుతోంది. సోషల్ మీడియాలో ఆమె ఫోటోలు చక్కర్లు కొడుతుండగా, పలువురు ఆమెకు సాయం చేసేందుకు ముందుకు వస్తున్నారు.