లేటుగా అయినా పొంగులేటి జంప్

Posted: 05/02/2016 01:20 PM IST

ఏపిలో ప్రస్తుతం ప్రతిపక్ష పార్టీ ఏ పరిస్థితిని ఎదుర్కొంటుందో అందరికి తెలుసు. పార్టీ నుండి ఎమ్మెల్యేలు, నాయకులు ఒక్కొక్కరుగా అధికారపక్షంలోకి వెళ్లిపోతున్నారు. దాదాపుగా వైసీపీ పార్టీకి నిన్నటి దాకా బలం అనుకున్న నాయకలు అందరూ పార్టీని వీడి సైకిలెక్కుతున్నారు.  ఇప్పుడిక తెలంగాణలో ఉన్న ఒకే ఒక్క నాయకుడు పొంగులేటి శ్రీనివాస్ రెడ్డి పార్టీ మారుతున్నారు. ఇప్పటికే మిగిలిన పార్టీల బలాన్ని తీసివేసిన కేసీఆర్.. తాజాగా పొంగులేటిని పార్టీలో కలుపుకోవడానికి ప్లాన్ సిద్దం చేయగా అది బాగా వర్కవుట్ అయింది. పొంగులేటితో పాటుగా మరో నాయకుడు కూడా టిఆర్ఎస్ తీర్థం పుచ్చుకోనున్నారు. మొత్తానికి ఏపిలో ఫ్యాన్ కు ఎదురుగాలి వీస్తోంది అంటే తెలంగాణలో ఏకంగా రెక్కలే ఊడిపోయాయి.

తెలంగాణ రాష్ట్రంలో వైసీపీ ఉనికి ఉన్నది కేవలం ఖమ్మం జిల్లాలోనే. ఇప్పుడు అక్కడ కూడా ఫ్యాన్‌ రెక్కలు ఇరిగిపోనున్నాయి. పాలేరు ఉపఎన్నిక విజయాన్ని ప్రతిష్టాత్మకంగా తీసుకున్న టీఆర్ఎస్. విపక్ష నేతల్ని తనవైపు తిప్పుకోవడం ద్వారా ఎదురులేని శక్తిగా నిలవాలని భావిస్తోంది. అందులో భాగంగా ఈసారి వైసీపీని టార్గెట్‌ చేశారు. ఇప్పటికే పాలేరు వైసీపీ అధ్యక్షుడు గులాబీ కండువా కప్పుకున్నారు. ఇప్పుడు ఎంపీ పొంగులేటి శ్రీనివాస్‌రెడ్డితోపాటు పినపాక ఎమ్మెల్యే పాయం వెంకటేశ్వర్లు కూడా కారెక్కేందుకు ముహూర్తం సిద్ధం చేసుకున్నారు. బుధవారం సీఎం కేసీఆర్ సమక్షంలో ఇద్దరూ గులాబీ కండువా కప్పుకోనున్నారు