డిగ్రీ విద్యార్థిని కిడ్నాప్.. ఆ వివాదమే కారణమా?

Posted: 08/26/2015 10:06 AM IST

Degree student loukika kidnap chittor district father ravi chitti basha difference

ఈ మధ్య కాలేజీల్లో విద్యార్థినులు వరుసగా ఆత్మహత్యలకు పాల్పడుతున్న సంఘటనలు సంచలనం రేపుతుండగా.. తాజాగా మరో విద్యార్థిని కిడ్నాప్ కి గురికావడం కలకం సృష్టిస్తోంది. చిత్తూరు జిల్లాలో ఓ డిగ్రీ విద్యార్థిని అదృశ్యం అయిన ఘటన ఆలస్యంగా వెలుగులోకి వచ్చింది. అయితే.. ఈమె కిడ్నాప్ కి గురి కావడం వెనుక ఓ బలమైన కారణముందని తల్లిదండ్రులతోపాటు స్థానికులు అనుమానిస్తున్నారు. ఇంతకీ ఆ కారణమేంటి..? అనేది తెలియాలంటే మేటర్ లోకి వెళ్లాల్సిందే!

పూర్తి వివరాల్లోకి వెళ్తే.. చిత్తూరు జిల్లా బంగారుపాళ్యం మండలం పాలమాకులపల్లికి చెందిన లౌకిక అనే విద్యార్థిని ఐదు రోజుల క్రితం కిడ్నాప్ కి గురైంది. కిడ్నాప్ కు గురికావడానికి ముందు ఆమె కాలేజీకి వెళ్తున్నానని చెప్పి ఇంటి నుంచి బయలుదేరింది. అయితే.. సాయంత్రం ఎంతసేపటికి ఆమె ఇంటికి తిరిగి రాకపోవడంతో ఆ విద్యార్థిని తల్లిదండ్రులు తీవ్ర ఆందోళనకు గురయ్యారు. ఆమె ఆచూకీ కోసం గాలించారు. ఆమె స్నేహితులను కూడా సంప్రదించారు. కానీ.. ఫలితం లేకపోవడంతో చివరికి వారు పోలీసులను ఆశ్రయించారు. తమ కూతురు కిడ్నాప్ కు గురైందని బాధుతురాలి తల్లిదండ్రులు ఫిర్యాదు చేశారు. తొలుత పోలీసులు ఈ ఫిర్యాదును ఏమాత్రం పట్టించుకోలేదు కానీ.. తాజాగా మీడియాలో ఓ విద్యార్థిని కిడ్నాప్ కు గురైందన్న వార్తలు రావడంతో వారు వెంటనే రంగంలోకి దిగి, కేసు నమోదు చేసి, దర్యాప్తు ముమ్మరం చేశారు.

ఈ కిడ్నాప్ వెనుక అసలు కారణాలేంటోనన్న విషయంపై పోలీసులు దర్యాప్తు చేయగా.. ఓ విషయం వెలుగులోకి వచ్చింది. బాధితురాలి తండ్రి రవికి, అదే గ్రామానికి చెందిన బాషా అనే వ్యక్తికి మధ్య చిట్టీల వ్యాపారానికి సంబంధించి వివాదం నడుస్తోందని తెలిసింది. ఆ వివాదం కారణంగానే విద్యార్థిని లౌకికను బాషానే కిడ్నాప్ చేసి వుంటాడని అనుమానిస్తున్నారు. కిడ్నాప్ కు గురైన విద్యార్థిని తండ్రి కూడా ఇదే విషయాన్ని ప్రస్తావిస్తూ పోలీసులకు ఫిర్యాదు చేశాడు. దీంతో.. ఆమె ఆచూకీ కోసం పోలీసులు గాలిస్తున్నారు. మరోవైపు.. ఈ కిడ్నాప్ వెనుక మరో కారణమేమైనా వుందా..? అనే కోణంలోనూ పోలీసులు దర్యాప్తు కొనసాగిస్తున్నారు.

AS